جەسىر ايەل ءوز قاينىسىنا تۇرمىسقا شىقسا بولا ما؟

 استانا. قازاقپارات - اسسالامۋ الەيكۋم! قايتىس بولعان اعاسىنىڭ ايەلىن، ياعني جەڭگەسىن قاينىسى الۋعا بولا ما؟ ە. قاليەۆ

ۋا الەيكۋم اسسالام!

حاديستە: «ەگەر سەندەرگە ءدىنى مەن مىنەز- قۇلقى ۇنايتىن كىسى سۇراپ كەلسە، وعان (قىزدارىڭدى) تۇرمىسقا بەرىڭدەر. ايتپەسە، جەر بەتىندە بۇلىك پەن وراسان زور بۇزىقتىق ەتكەن بولاسىڭدار[1]» ، - دەپ ايتىلعانداي، جەسىر ايەلدىڭ تۇرمىس قۇرماي ءجۇرۋى ار- نامىسىنا جانە جالپى قوعامعا زيانى تيەدى. كۇيەۋى قايتىس بولعان ايەل ءوزى قالاعان ەر كىسىمەن قايتا شاڭىراق كوتەرۋىنە بولادى. دەگەنمەن، مىنەزى جاقسى جانە ءدىندار قايناعاسى نەمەسە قاينىسىنا تۇرمىسقا شىعۋى باسقا ەر كىسىگە جار بولۋدان الدەقايدا جاقسىراق. ونىڭ كوپتەگەن پايداسى بار.

1. مارقۇمنىڭ باۋىرلارى جەتىم بالالاردىڭ اعاسى بولعاندىقتان، ولاردىڭ مەيىرىمى مەن قامقورلىعى باسقا ەر كىسىدەن قاراعاندا كوبىرەك؛

2. شاريعات بويىنشا ايەل قايتا تۇرمىسقا شىقسا، قىزىن قايتىس بولعان (نەمەسە اجىراسقان) كۇيەۋىنىڭ تۋىستارىنىڭ قامقورلىعىنا بەرۋى كەرەك. ال، قاينىسىنا تۇرمىسقا شىقسا، قىز ايەلدىڭ جانىندا قالا بەرەدى؛

3. ايەلدىڭ سول شاڭىراقتا قالۋى اتا- ەنەسى جانە باسقا دا تۋىستارىنىڭ قامقورلىعى مەن مەيىرىمىندە بولۋىنىڭ كەپىلى؛

4. بالالارى دا اناسىنىڭ باسقا كىسىگە تۇرمىسقا شىققانىنان گورى، ءوز اكەسىنىڭ باۋىرلارى قاراماعىندا بولعانىن كوبىرەك قالاۋى مۇمكىن.

muslim.kz