ەلىمىزدە قىز- كەلىنشەكتەرگە ارنالعان ۇلتتىق ناقىشتاعى سىرت كيىمدەر شىعارىلا باستايدى
شەتەلدىك تاجىريبەلى تىگىنشىنى وبلىستىق كاسىپكەرلىك پالاتاسى «اعا ساراپشىلار قىزمەتى» اتتى حالىقارالىق باعدارلاما اياسىندا شاقىرتقان. نەمىس ديزاينەرى فابريكا ماماندارىنا تەگىن كەڭەس بەرۋدە.
ياتتا حايدەلمان زاۋىت قىزمەتكەرلەرىنە ءداستۇرلى ناقىشتاردى ساقتاي وتىرىپ، زاماناۋي ۇلگىدەگى سىرت كيىمدەر تىگۋدىڭ قىر- سىرىن ۇيرەتىپ جاتىر. قازىردىڭ وزىندە ديزاينەرلەر قىز- كەلىنشەكتەر پالتوسىنىڭ 12 ۇلگىسىن جاساپ ۇلگەردى. ونىڭ 8 ءى وندىرىسكە دايىن. وتاندىق ءونىم قازان ايىندا ىشكى نارىققا شىعارىلادى. ازىرگە وعان قاجەتتى شيكىزات تۇركيا مەن يتاليادان اكەلىنۋدە. كوزدىڭ جاۋىن الاتىن كلاسسيكالىق كيىمدەر ويۋ- ورنەكپەن كومكەرىلگەن. ايتا كەتەرلىگى، وتاندىق ءونىم يمپورتتان 20-30 پايىزعا دەيىن ارزان بولماق. سونىمەن قاتار تاراپتاردىڭ ەندى ەرلەر جانە ايەلدەر كوستيۋمىنىڭ ۇلگىسىن كوبەيتپەك ويى بار. ديزاينەرلەر كوپ ۇزاماي- اق ەرلەردىڭ دە پالتوسىن تىگۋدى جوسپارلاپ وتىر.
ياتتا حايدەلمان، نەمىس ديزاينەرى:
- مەنىڭ ويىمشا، بۇل كاسىپورىننىڭ بولاشاعى زور. ويتكەنى مۇندا قولىنىڭ قيۋى بار تىگىنشىلەر ەڭبەك ەتىپ جاتىر. ولار ءاربىر ءونىمنىڭ ساپالى بولىپ تىگىلۋىنە ءمان بەرەدى. ءبىز قازىر بىرىگىپ، سىرت كيىمنىڭ وزىق الەمدىك ۇلگىسىن جاسادىق. ولار - قىسقا جانە ۇزىن ايەلدەر پالتوسى. تىگىنشىلەر وڭدى ناتيجەگە قول جەتكىزەدى دەپ ويلايمىن.
ايجان قالمۇراتوۆا، تىگىن فابريكاسىنىڭ وكىلى:
- قازىرگى ۋاقىتتا ءبىز ايەلدەرگە ارنالعان 12 ءتۇرلى سىرت كيىمنىڭ ۇلگىسىن جاساپ جاتىرمىز. 1-2 اي كولەمىندە قازاقستان حالقىنا ءوزىمىزدىڭ ۇلتتىق ويۋ- ورنەكتەرمەن اسەمدەلگەن ءساندى پالتو ۇلگىسىن ايەلدەرىمىزگە، قىز- كەلىنشەكتەرىمىزگە ۇسىنا الامىز.
www.24.kz
