قازاقستانداعى ەڭ ۇزىن الما ءبالىشى تالدىقورعاندا ءپىسىرىلدى
«ءدامى ءتىل ۇيىرەتىن ءتاتتى بالىشكە 450 كەلى الما، 390 كەلى ۇن، 117 كەلى قانت، 90 ليتر ءسۇت، 70 كەلى ماي، 5 كەلى اشىتقى جانە 300 جۇمىرتقا پايدالانىلدى»، - دەيدى ۇيىمداستىرۋشىلار.
الما ءبالىشى «تالدىقورعان باق قالا» فەستيۆالى اياسىندا ازىرلەندى. ايتا كەتەيىك، بۇگىندە عالىمدار المانىڭ وتانى قازاقستاننىڭ الاتاۋ بوكتەرى ەكەنىن دالەلدەپ جاتىر. الەمدەگى الما اتاۋلىسى سيۆەرس الماسىنان (جابايى المادان) تاراعان. قازىر جەر جۇزىندەگى سيۆەرس الماسىنىڭ 68 پايىزى الماتى وبلىسىندا. وسىعان بايلانىستى «تالدىقورعان باق قالا» جوباسىنىڭ ماقساتى وسى سيۆەرس الماسىن كوبەيتۋگە ۇلەس قوسۋ.
ەستەرىڭىزگە سالا كەتەيىك، جىل باسىندا قالا اكىمدىگى تاۋەلىزدىكتىڭ 25 جىلدىعىنا 25 مىڭ ءتۇپ اعاش وتىرعىزۋ اكسياسىن باستاعان بولاتىن. بۇل شارا كەيىننەن «تالدىقورعان باق قالا» جوباسىنا ۇلاستى. ونىڭ اياسىندا بۇگىنگە دەيىن شاھاردا 38 مىڭ ءتۇپ كوشەت وتىرعىزىلدى.
