استاناداعى ەۋرازيا ۇلتتىق ۋنيۆەرسيتەتى ءوز جەر سەرىگىن عارىشقا شىعارماق
بۇل تۋرالى اتالعان ج و و- نىڭ باسپا ءسوز قىزمەتى حابارلادى.
ءبىزدىڭ ماقسات - عارىشقا ءوزىمىزدىڭ العاشقى جەرسەرىگىن جاساپ، شىعارۋ. ەڭ باستىسى ءبىز ونى باسقا جاقتان ساتىپ الماي، ءوزىمىز جاسايمىز، - دەدى ە ۇ ۋ رەكتورى ەرلان سىدىقوۆ ءوزىنىڭ حالىقپەن ەسەپتىك كەزدەسۋىندە.
سونىمەن قاتار رەكتور «عارىشتىق تەحنيكا مەن تەحنولوگيا» كافەدراسىنىڭ ماگيسترانتتارى مەن ماماندارى عارىشتىق كەڭىستىك مونيتورينگى جونىندە كاسىپتىك دەڭگەيدە تولىقتاي جۇمىس جۇرگىزۋدە دەپ اتاپ ءوتتى.
ۋنيۆەرسيتەت ماقساتى - عارىشتىق سالاداعى امبەباپ مامان دايىنداۋ. بۇل جونىندە ەلباسى: «قازاقستان عارىشتىق دەرجاۆا بولۋ كەرەك. بۇل ءۇشىن ۇلكەن قاراجات بولىنگەن، ەڭ ۇزدىك دەگەن ماماندار تارتىلۋدا جانە مەملەكەتتىك قۇرىلىمدار جاسالۋدا» دەگەن، - دەپ اتاپ ءوتتى ەرلان باتتاش ۇلى.
تاعى ءبىر توقتالار جايت، 2015 -جىلدان باستاپ ۋنيۆەرسيتەت «عارىشتىق تەحنيكا مەن تەحنولوگيا» جانە «قۇرىلىس ماتەريالدارىنىڭ بۇيىمدارى مەن كونسترۋكتسياسىن جاساپ شىعارۋ» ماماندىقتارى بويىنشا ماگيسترانتتار دايارلاۋدا.
بيىل تاعى 3 ماماندىق: «بيوتەحنولوگيا»، «راديوتەحنيكا، ەلەكترونيكا جانە تەلەكوممۋنيكاتسيا»، «جىلۋ ەنەرگەتيكاسى» اشىلدى.
جالپى سوماسى 449104 مىڭ تەڭگەنى قۇرايتىن «قۇرىلىس ماتەريالدارى مەن بۇيىمدارىنىڭ زەرتحاناسى» جانە «كىشى عارىشتىق اپپاراتتار زەرتحاناسى» اتتى 2 زەرتحانا قۇرىلدى. بۇل قۇرىلىمدىق بولىمشەلەر زاماناۋي قۇرال- جابدىقتارمەن جابدىقتالعان. قۇرال- جابدىقتاردى ءپانارالىق عىلىمداردا: فيزيكا، نانوتەحنولوگيا، فيزيكالىق جانە اناليتيكالىق حيميا، بيوتەحنولوگيا سالاسىندا قولدانۋعا بولادى.
جىل سوڭىنا دەيىن تاعى ەكى زەرتحانا اشۋ جوسپاردا بار. بۇل ماماندىقتاردا 568 ماگيسترانت ءبىلىم الادى. بۇل ماماندىقتار بويىنشا الەمدىك ستاندارتتارعا سايكەس تاجىريبەگە باعىتتالعان وقۋ باعدارلاماسى قۇراستىرىلعان. وقۋ باعدارلاماسىن جۇزەگە اسىرۋ ءۇشىن گەرمانيا، وڭتۇستىك كورەيا، پولشا، تۇركيا جانە قىتايدىڭ سەرىكتەس ۋنيۆەرسيتەتتەرىنەن ماماندار جۇمىلدىرىلعان.
