قىتاي يۋانى حالىقارالىق قولدانىستاعى ۆاليۋتاعا اينالماق
سوڭعى 15 جىل بويى ا ق ش دوللارى، بريتاندىق فۋنت ستەرلينگ، ەۋرو جانە جاپوندىق يەن الەمدىك رەزەرۆتىك ۆاليۋتا قىزمەتىن اتقارىپ كەلگەن ەدى، ەندى بۇل تىزىمگە قىتايدىڭ يۋانى قوسىلادى، دەپ حابارلايدى Deutsche Welle باسىلىمى.
حالىقارالىق ۆاليۋتا قورىنىڭ ديرەكتورلار كەڭەسى 2015 -جىلدىڭ 30 -قاراشاسىندا بەيجىڭنىڭ ءوتىنىشىن قاناعاتتاندىرىپ، ون ايدان كەيىن ءوزىنىڭ ۆاليۋتالىق سەبەتىنە ق ح ر اقشاسىن قوسۋعا شەشىم شىعاردى.
ايتا كەتەيىك، باستاپقىدا الەمدە 16 رەزەرۆتىك ۆاليۋتا بولعان، ءبىراق 1981 -جىلى ولاردىڭ سانىن بەسەۋگە دەيىن قىسقارتقان: ا ق ش دوللارى، نەمىس ماركاسى، فرانسۋز فرانكى، بريتاندىق فۋنت جانە جاپوندىق يەنا قالدى.
2000 -جىلى ەۋرو ەنگىزىلگەننەن كەيىن، ماركا جانە فرانك جاڭا ۆاليۋتاعا جول بەرگەن بولاتىن. ەندى مىنە ح ۆ ق تاريحىندا العاش رەت ەكسكليۋزيۆتى كلۋبقا جاڭا مۇشە قابىلداندى.
يۋان بىردەن ءۇشىنشى ورىندى ەنشىلەپ، 11 پايىز ۇلەسكە يە بولدى. دوللار شامامەن 40 پايىز دەڭگەيىندە قالدى، ال ەۋرونىڭ ۇلەسى 37 پايىزدان 31 پايىزعا تومەندەگەن. كيلدەگى الەمدىك ەكونوميكا ينستيتۋتىنىڭ بۇرىڭعى ۆيتسە- پرەزيدەنتى پروفەسسور رولف لانگحاممەر بۇل شەشىمدى تولىقتاي اقتالعان دەپ ەسەپتەيدى: «حالىقارالىق ساۋداداعى ءرولى باسەڭدەپ، قىسقارعاندىقتان، ەۋرونىڭ حالىقارالىق ەسەپتەگى ماڭىزدىلىعى ازايۋدا» .
حەننينگ فەپەلدىڭ پىكىرىنشە، بۇگىنگى تاڭدا، ەكسپورتتى دامىتۋ ماقساتىندا، ق ح ر بيلىگى جاساندى تۇردە يۋاننىڭ ايىرباس باعامىن تومەندەتىپ وتىر، الايدا ۇزاقمەرزىمدى جوسپاردا قىتاي قۇبىلمالى ۆاليۋتالىق باعامعا قىزىعۋشىلىق تانىتادى.
«قىتاي قازىرگى تاڭدا ءوزىنىڭ دامۋ مودەلىن اۋىستىرىپ جاتىر، ول ەكسپورتقا نەگىزدەلگەن وسىمنەن الشاقتاپ، ىشكى نارىق ەسەبىنەن وسۋگە باعىت العان. يۋان باعامىنىڭ جوعارىلاۋى وسى ەكونوميكالىق مودەلدى جۇرگىزۋگە ءوز ىقپالىن تيگىزەدى». قىتايدىڭ تازا نارىققا كوشۋى 10 جىلدان 15 جىلعا دەيىن ۋاقىت الۋى مۇمكىن دەپ ەسەپتەيدى HWWI ديرەكتورى.
