قىتايدا تۋريستىك جولدامالار كۇرت قىمباتتادى
ءبىرىنشى قازاننان باستالاتىن مەملەكەتتىڭ باستى مەرەكەسى ءبىر اپتاعا سوزىلادى. قىتايلىق تۋريستەر كوپ تاڭدايتىن ەلدەر - جاپونيا، كورەي رەسپۋبليكاسى.
جىل سايىن «التىن اپتا» كەزەڭىندە وسى باعىتتاعى جولدامالاردىڭ قۇنى كۇرت قىمباتتاپ كەتەدى. ماسەلەن، ءدال قازىر جاپونياعا بارىپ قايتۋ تۋرى 11 مىڭ يۋان تۇرادى. بۇل سومما ادەتتەگى باعادان 3500 يۋانعا ارتىق. مەرەكە قارساڭىندا قىتايلىقتار سونىمەن بىرگە تايلاند، مالايزيا جانە باسقا دا ارالداردا ورنالاسقان ەلدەرگە اعىلادى. تۋريستىك وپەراتورلار بۇل باعىتتاعى جولدامالاردىڭ قۇنىن دا % 10-20- عا قىمباتتاتىپ جىبەرگەن. بۇل - اۋە بيلەتتەرى مەن قوناق ۇيلەردىڭ قىزمەتىنە قوسىلعان قۇن. تۋريستىك فيرما وكىلدەرىنىڭ ايتۋىنشا، قازىر قىتايدا ۆيزاسىز رەجيمدەگى ەلدەردەگى دەمالىسقا دەگەن سۇرانىس وتە جوعارى.
جان حۋننان، تۋريستىك كومپانيانىڭ ديرەكتورى:
- تۋريستەردىڭ كوبى چەدجۋدو ارالى، سايپان جانە مالديۆى ارالدارىندا دەمالعاندى قالايدى. بۇل جەرلەرگە بارۋ ءۇشىن تۋريستەرگە قىتايدان دا، سول ەلدەن دە ۆيزا اشتىرۋدىڭ قاجەتى جوق.
كۇز ماۋسىمىندا ءبىر جەتىگە دەيىن سوزىلاتىن دەمالىستى قىتايلار «التىن اپتا» دەپ اتاپ، ەل ءىشىن ارالايدى. اسىرەسە تاۋلى ءوڭىر يۇننان، جىجياڭ، سىچۋان، حاينان پروۆينتسيالارىنا ءجيى بارادى. سونىمەن بىرگە دەمالىسىن تابيعاتتىڭ سۇلۋلىعىن تاماشالاۋمەن وتكىزەتىن ەكوتۋريزمدى قالايتىنداردىڭ دا قاتارى كوپ. قىتايلىقتار الەمدەگى ەڭ كوپ ساياحات جاسايتىن حالىقتىڭ قاتارىنا كىرەدى. تەك بىلتىر عانا شەتەلگە 117 ميلليون ادام شىققان. مۇنىڭ ءوزى سوڭعى جىلدارداعى ەڭ تومەنگى كورسەتكىش. قىتاي تۋريزم اكادەمياسى وسىنداي دەرەكتەر كەلتىرىپ وتىر. مامانداردىڭ ايتۋىنشا، ق ح ر 2015 -جىلى شەتەلدەگى ساپارلارىنا 104 ميلليارد دوللار جۇمساعان ەكەن. بۇل 2014 -جىلعى كورسەتكىشپەن سالىستىرعاندا 16,5 پايىزعا ارتىق. ءاربىر ادامعا جۇمسالعان ورتاشا شىعىن 900 دوللاردى قۇراپ وتىر.
www.24.kz
