كاسپيدە تەڭىز سۋىن تۇشىلايتىن جاڭا زاۋىت سالىنادى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ماڭعىستاۋ وبلىسى يندۋستريالدىق- يننوۆاتسيالىق دامۋ باسقارماسىنىڭ باسشىسى نۇربەك قاراسايەۆ ءمالىم ەتتى.
«وبلىستا تەڭىز سۋىن اۋىزسۋعا اينالدىراتىن زاۋىتتى سالۋعا ينۆەستورلاردى ىزدەۋ جۇمىستارى قارقىندى ءجۇرىپ جاتىر. جاڭاوزەن تۇرعىندارىن اۋىزسۋمەن قامتاماسىز ەتەتىن كەندىرلى ماڭىنداعى تەڭىز سۋىن تۇشىلايتىن زاۋىتتىڭ ينۆەستورلارى انىقتالدى»، - دەدى قاراسايەۆ تىلشىلەردىڭ ساۋالىنا بەرگەن جاۋابىندا.
كەيىن، تىلشىلەرگە جەكە سۇحبات بەرگەن ول، اتالمىش جوبا ەگەر ەكى تاراپ 2,5 جىلدا كەلىسىمگە كەلگەن جاعدايدا عانا جۇزەگە اسىرىلاتىنىن اتاپ ءوتتى.
«زاۋىت قۋاتى مەن جوبا قۇنى تۋرالى قازىر مەن ايتا المايمىن. سەبەبى قازىر تەك ينۆەستور تابىلدى. بۇل نىساندى «قازمۇنايگاز» رەتتەيدى. سەبەبى ول «جاڭاوزەن مۇنايگاز» كومپانياسىمەن بىرگە قولعا الىنىپ وتىرعان جۇمىس. قازىرگى كەزدە ق م گ ءۇش ينۆەستوردىڭ ءبىرىن تاڭداپ الدى. ەگەر ولار ينۆەستيتسيالىق كەلىسىمگە قول قوياتىن بولسا، وندا بۇل 2,5 جىلدىڭ جۇمىسى»، - دەدى ول.
سۋ تۇشىلايتىن زاۋىت كاسپي جاعاسىنا جاقىن تۇستا، ماڭعىستاۋ وبلىسى قاراقيا اۋدانىندا ورنالاسۋى مۇمكىن.
«تەڭىز سۋىن پايدالاناتىندىقتان، زاۋىت كاسپي ماڭىندا بولاتىنى قيسىندى. كەيىن اۋىزسۋعا اينالعان تۇشى سۋ قۇبىرلارمەن ەلدىمەكەنگە جەتكىزىلەدى. ەڭ ءبىرىنشى اتالمىش سۋ «جاڭاوزەن مۇنايگاز» بەن جەرگىلىكتى حالىق ءۇشىن جاسالىپ وتىر. سەبەبى تۇشى سۋ بۇل ايماقتا تاپشى»، - دەدى قاراسايەۆ.
اۆتور: جاسۇلان جولدىبايەۆ
