ەستونيادا ورىسشا شىعاتىن سوڭعى مەرزىمدى باسىلىمدار جابىلدى
ولار وقىرماندار سانى كۇرت تومەندەپ جانە جارناما بەرىلمەگەن سوڭ وسىنداي قادامعا بارعان. بەيسەنبىدە Postimees باسىلىمى ءوزىنىڭ جابىلعانىن جاريا ەتىپ، الداعى ۋاقىتتا عالامتورداعى ءۇش پورتالدى قولعا الاتىنىن مالىمدەدى.
«سوڭعى جىلدارى ەستونيادا شىعاتىن بارلىق ورىس ءتىلدى گازەتتەردىڭ وقىرماندارى مەن جازىلۋشىلارى كۇرت ازايدى. الايدا ورىسشا شىعاتىن ونلاين باسىلىمداردىڭ وقىرماندارى ارتۋدا»، - دەپ ءمالىم ەتتى AS Postimees Grupp باسقارماسىنىڭ ءتوراعاسى پەەپ كالا.
ونىڭ ايتۋىنشا، وسى سەبەپتى عالامتورداعى جاڭالىق پورتالدارىنا ينۆەستيتسيا سالۋعا شەشىم قابىلداندى.
AS Postimees Grupp بالتىق ەلدەرىندەگى ءۇش كونسەرننىڭ ءبىرى - Eesti Meedia قۇرامىنا كىرەدى. اكسيونەرلىك قوعام Postimees كونە ەستوندىق گازەتىن جانە ءبىرقاتار وڭىرلىك گازەتتەر مەن جاڭالىق پورتالدارىن شىعارادى.
ەستونياداعى 1,3 ميلليون تۇرعىننىڭ 29 پايىزى ورىس ءتىلىن انا ءتىلى سانايدى. ەلدە وسى ءتىلدى مەڭگەرگەندەر ۇلەسى 72 پايىز شاماسىندا.
