قازاقستاندا عارىش سۋرەتتەرى ارقىلى زاڭسىز مۇناي كەنىشتەرىن انىقتاۋ جوسپارلانۋدا
بۇل تۋرالى ق ر پارلامەنتى سەناتىنىڭ سالىق ماسەلەلەرىن تالقىلاۋعا ارنالعان جۇمىس توبىندا ق ر قارجى مينيسترلىگى مەملەكەتتىك كىرىستەر كوميتەتىنىڭ ءتوراعاسى داۋلەت ەرعوجين ءمالىم ەتتى.
ونىڭ ءسوزى بويىنشا، سالىق ورگاندارى عارىشتان تۇسىرىلگەن سۋرەتتەردى پايدالانا باستادى. سىناق رەتىندە اقمولا وبلىسى سەلينوگراد اۋدانى الىنعان. ناتيجەسى جاعا ۇستاتادى.
«اقپاراتتىق تەحنولوگيالاردى قولدانعان كەزدە كوپ مالىمەتتەر تۇسەدى. مىسالى، قازىر ءبىز جەرسەرىكتەردى قولدانۋ ارقىلى جاڭا باعدارلاما باستادىق. جەرسەرىك مەملەكەتتىك كىرىستەر كوميتەتىنە نە قاتىسى بار دەگەن سۇراق تۋۋى مۇمكىن. بۇگىن ءبىز ءبىرىنشى كەزەڭىن اياقتادىق. استانا ماڭىنداعى بارلىق جەرلەردى عارىشتان تۇسىردىك. ول جەر قويناۋىن زاڭدى نەمەسە زاڭسىز پايدالانۋعا قاتىستى اقپاراتتى الۋ ءۇشىن جاسالدى. جەرسەرىكتىك سۋرەتتەر تىركەلمەگەن جانە كەلىسىمسىز جۇمىس جاساپ جاتقان جەر قويناۋىن پايدالانۋشىلاردى انىقتاۋ ءۇشىن قولدانامىز. سەلينوگراد اۋدانىنىڭ وزىندە 19 زاڭسىز كەن ورىندارى انىقتالدى. توپىراق، ساز، قيىرشىق تاس شىعاراتىن كەنىشتەر. ولاردا جەر قويناۋىن پايدالانۋ تۋرالى كەلىسىمشارت جوق. اقپاراتتىق تەحنولوگيانى پايدالانۋدىڭ وڭ تۇسى وسى»، - دەدى ول.
د. ەرعوجيننىڭ سوزىنشە، عارىش تۇسىرىلىمدەرى كوميتەت ءۇشىن ۇلكەن قاراجات تالاپ ەتپەيدى، كەرىسىنشە ونى ۇنەمدەيدى.
«ونىڭ قۇنى ءبىز ءۇشىن تيىن تۇرادى. جەدەل توپ قۇرىپ، ولارعا قاجەتتى قۇرالداردى بولگەنشە، بىرنەشە شارشى شاقىرىم جەردىڭ عارىشتان تۇسىرىلگەن فوتوسۋرەتىن 30 مىڭ تەڭگەگە الىپ، قايدا بارۋ كەرەكتىگىن ءبىلىپ وتىرعان الدەقايدا جىلدام ءارى ءتيىمدى. تەك ءبىر عانا اۋداندا 19 زاڭسىز كەن ورنى تابىلدى. ءبىز ەندى كەلەسىدە باتىس قازاقستاندا، ورتالىق قازاقستاندا مۇنايدى زاڭسىز ءوندىرۋ كەنىشتەرىن انىقتاۋعا كۇش سالۋدى جوسپارلاۋدامىز. جاڭاعى 19 كەن ورنى سول اۋداننىڭ كىرىسىن ەسەلەپ ارتتىرادى. سەبەبى ولار سالىق تولەۋگە مىندەتتەلەدى. بۇل جاقسى، سوندىقتان ءبىز وسىنداي جۇمىستاردى قولعا الدىق»، - دەپ اتاپ ءوتتى ول.
اۆتور: جاسۇلان جولدىبايەۆ
