ەلىمىزدە دەنى ساۋ، ەرىنبەگەن ادامعا تابىسقا كەنەلۋگە بارلىق جاعداي جاسالعان - اۋىل كاسىپكەرى
«قازاقپارات» ح ا ا ءتىلشىسى ەرەيمەنتاۋ اۋدانىنا قاراستى نوۆوماركوۆكا سەلوسىنىڭ تۇرعىنى، جەكە كاسىپكەر تولەۋحان رومبايمەن سۇحباتتاسقان ەدى.
«سوناۋ 2007 -جىلى جولداسىم ەكەۋىمىز التى بالامەن موڭعوليادان اتاجۇرتقا قونىس اۋدارعان ەدىك. كوپبالالى وتباسى ءۇشىن ءبىر مەملەكەتتەن ەكىنشى مەملەكەتكە قونىس اۋدارۋ وڭاي شارۋا ەمەس. ارينە، باستاپقى كەزدە قيىندىقتار بولدى. دەگەنمەن، جەرگىلىكتى اكىمدىك پەن ونداعى مامانداردىڭ كومەگىنىڭ ارقاسىندا بار قيىندىقتى ارتقا تاستاپ، قازىر شارۋامىز ورگە جۇزە باستادى. العاش كەلگەن كەزىمدە اۋىل اكىمى گريگوري سامويلەنكوعا بارىپ، كومەك، اقىل- كەڭەس سۇراعان ەدىم. بىلىكتى دە، ادامگەرشىلىگى مول اكىم مەنىڭ جاعدايىمدى، كوپ بالالى ەكەنىمدى بىردەن ءتۇسىنىپ، قولدان كەلگەنشە اقىل- كەڭەسىن ايتتى. ءتىپتى، 50 گەكتار شابىندىق جەر الۋىمدى ۇسىندى. «بۇل ساعان مال شارۋاشىلىعىمەن اينالىسۋعا زور مۇمكىندىك»، دەگەن ەدى اكىم. كەيىن كوپ ۇزاماي وسى ازاماتتىڭ شاراپاتىمەن مال شارۋاشىلىعىن قولعا الدىم»، - دەپ ءسوزىن باستادى كاسىپكەر.
ونىڭ ايتۋىنشا، اۋىلدىق جەردە شاعىن جانە ورتا بيزنەسكە جۇرتشىلىقتىڭ ىنتاسى جىل ساناپ ارتىپ كەلەدى. اسىرەسە، اۋىل تۇرعىندارى ءۇشىن بيزنەسىن وركەندەتۋگە نەگىزىنەن مال شارۋاشىلىعىمەن اينالىسۋ قولايلى سانالادى.
«شارۋا قوجالىعىمىزدا 30 دان استام جىلقى، 20 دان استام ءىرى قارا كۇتىلۋدە. شارۋاشىلىقپەن بۇكىل وتباسىممەن بىرلەسىپ اينالىسۋدامىز. بيە بايلاپ، سيىر ساۋىپ، ءسۇتتى سۇتتەي، قىمىزدى قىمىزداي ساتۋدامىز. ەلىمىزدە دەنى ساۋ، ەرىنبەگەن ادامعا مال اسىراپ، تابىسقا كەنەلۋگە بارلىق جاعداي جاسالعان. شارۋاشىلىعىمىزدا بەس ادام ەڭبەك ەتەدى. ولاردىڭ ايلىعىن ۋاقىتىلى تولەپ تۇرۋ مەنىڭ مىندەتىم. وسىدان بىرەر جىل بۇرىن «جۇمىسپەن قامتۋ - 2020» مەم باعدارلاماسى ارقىلى نەسيە الىپ، قاساپحانا اشتىم. ونىڭ قۋاتى كۇنىنە 10-12 باس مالدى سويۋعا مۇمكىندىك بەرەدى. قاساپحانادا 2 ادام جۇمىس ىستەيدى. جاقىندا تولىق قۋاتىنا شىعارۋدى كوزدەپ وتىرمىز. مۇنىمەن قاتار، كەلەشەكتە قوي شارۋاشىلىعىن قولعا الىپ، جۇمىسشىلارىمىزعا باسپانا سالۋ دا جوسپاردا بار»، - دەيدى كەلەشەككە زور سەنىممەن قاراعان ت. رومباي.
بۇگىندە تولەۋحان رومبايدىڭ مال شارۋاشىلىعىن قولعا العانىنا 7-8 جىلدىڭ ءجۇزى بولدى. وسى از عانا ۋاقىتتىڭ ىشىندە كاسىپكەر ءبىرقاتار تابىستارعا قول جەتكىزىپ ۇلگەردى.
اۆتور: اسلان وسپانوۆ
