باس پروكۋراتۋرا بيزنەسمەندەر اراسىندا داۋلاردى سوتتان تىس شەشۋدىڭ تەتىگىن قۇرماق
بۇل تۋرالى بۇگىن اقتوبە وبلىسىنىڭ كاسىپكەرلەرىمەن كەزدەسكەن ەلىمىزدىڭ باس پروكۋرورى جاقىپ اسانوۆ ايتتى.
"بيزنەستى قورعاۋ سالاسىنداعى جۇمىستىڭ تاعى ءبىر ماڭىزدى باعىتى - بۇل ازاماتتىق داۋلار جانە اكىمشىلىك ىستەر. جىل سايىن سوتتارعا 700 مىڭنان استام تالاپ ارىزدار كەلىپ تۇسەدى. بۇل 1,5 ميلليون جەكە جانە زاڭدى تۇلعالار. كەز كەلگەن ادامنان "قالىڭىز قالاي؟" دەپ سۇراساڭىز، "سوتتاسىپ جاتىرمىن" دەگەن جاۋاپتى ءجيى ەستيسىز. قارجى مينيسترلىگى، اۋىل شارۋاشىلىعى مينيسترلىگى جانە ەنەرگەتيكا مينيسترلىگى جانىنداعى داۋلاردى قاراۋ بويىنشا اپەللياتسيالىق كوميسسيانى قۇرۋ تۋرالى ءبىزدىڭ ۇسىنىسىمىزدى ۇكىمەت قولدادى»، - دەدى باس پروكۋرور.
سونىمەن قاتار ول قازىرگى ۋاقىتتا باس پروكۋراتۋرا بيزنەسمەندەر اراسىندا داۋلاردى سوتتان تىس شەشۋدىڭ تەتىگىن قۇرۋدى ويلاستىرىپ جاتقانىن، وسى ماقساتتا "اتامەكەن" ۇلتتىق كاسىپكەرلەر پالاتاسىنىڭ مۇمكىندىگىن قولدانۋ دۇرىس بولاتىندىعىن اتاپ ءوتتى.
«بولار- بولماس بۇزۋشىلىقتار ءۇشىن وتە ۇلكەن اكىمشىلىك ايىپپۇلداردىڭ سالىنۋى بيزنەس ءۇشىن ۇلكەن اۋىرتپالىق بولىپ وتىر. ولار كەلتىرىلگەن شىعىننان الدەقايدا جوعارى بولادى جانە بيزنەستى شىعىنعا باتىرادى. مىسالى، ەگەر ءسىز تابيعي مونوپوليانىڭ كىشىگىرىم سۋبەكتىسى بولساڭىز جانە ۋاقىتىندا ەسەپ بەرمەسەڭىز، وندا جارتى ميلليون تەڭگەگە دەيىن ايىپپۇل تولەيسىز.
بيزنەس "كولەڭكەگە كەتپەس" ءۇشىن ايىپپۇلداردى 50 پايىزعا دەيىن قىسقارتۋدى، ال بولار- بولماس بۇزۋشىلىقتار ءۇشىن ەسكەرتۋمەن شەكتەلگەندى ۇسىندىق. سونىمەن قاتار بۇزۋشىلىقتار جويىلعان بولسا، رۇقسات بەرۋدى قالپىنا كەلتىرۋ مۇمكىندىگىن ۇسىنىپ وتىرمىز"، - دەدى باس پروكۋرور.
