قازاق ءتىلى ماسەلەسىن شەشپەسەك، ول دا تەرروريزمگە اكەلۋى مۇمكىن
استانادا ءوتىپ جاتقان «قازىرگى كەزەڭدەگى ەكسترەميزم مەن تەرروريزمنىڭ الدىن الۋ مەن جولىن كەسۋدىڭ زاڭنامالىق جانە ينستيتۋتسيونالدىق شارالارى» جيىنىندا قوعام قايراتكەرى بەرىك ءابدىعالي وسىنداي پىكىر ءبىلدىردى، دەپ حابارلايدى BNews.kz.
«تەرروريزم مەن ەكسترەميزم تەك قانا ءدىننىڭ اتىن جامىلمايدى. بۇگىنگى كۇنى ول مۇمكىندىگىنشە قوعامنىڭ نارازى تۇستارىن پايدالانىپ قالعىسى كەلەدى. الەۋمەتتىك ماسەلەنىڭ دە اتىن جامىلادى، كەرەك دەسەڭىز، ەرتەڭ ءتىل ماسەلەسىنە دە ارالاسادى»، - دەيدى بەرىك ءابدىعالي.
ونىڭ پىكىرىنشە، بۇگىنگى قوعامداعى قازاق ءتىلى ماسەلەسى شەشىلمەسە، ول دا ەكسترەميزم مەن تەرروريزمگە اكەلۋى ابدەن مۇمكىن.
«قازاق ءتىلى ماسەلەسىن شەشپەسەك، ۇلكەن ساياسي پروبلەماعا اينالۋى ىقتيمال»، - دەيدى قوعام قايراتكەرى.
بەرىك ءابدىعاليدىڭ پايىمداۋىنشا، ءتىل، ءبىلىم سالاسىنداعى رەفورمالاردى جەر ماسەلەسى سياقتى قوعام بولىپ تالقىلاۋ قاجەت.
«ءماجىلىستىڭ وسىنداي باستاماسىنا تەك قولداۋ كورسەتىپ، قوعامداعى ماسەلەلەردى تالقىلاۋ كەرەك. سوندا عانا ەكسترەميزم مەن تەرروريزمنىڭ الدىن الامىز»، - دەگەن سەنىمىن ءبىلدىردى ول.
