نۇرىمبەتوۆ: جۇمىسسىزدىق دەڭگەيىنىڭ ارتۋىنا جول بەرمەۋگە تىرىسۋدامىز
بۇل تۋرالى بۇگىن ورتالىق كوممۋنيكاتسيالار قىزمەتىندە «جالپىعا ورتاق ەڭبەك قوعامىن قۇرۋ مەن حالىقتى جۇمىسپەن قامتۋ» تاقىرىبىندا وتكەن بريفينگتە ق ر دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى ءبىرجان نۇرىمبەتوۆ مالىمدەدى.
ونىڭ سوزىنە قاراعاندا، بيىلعى 8 ايدا «ج ج ك 2020» باعدارلاماسىن ىسكە اسىرۋ اياسىندا 111,9 مىڭ ادام جۇمىسپەن قامتۋدىڭ بەلسەندى شارالارىنا قاتىسقانىن مالىمدەدى. ونىڭ ىشىندە جۇمىسسىزدار 74,4 مىڭ ادام (%66,5)، ءوزىن- ءوزى جۇمىسپەن قامتىعاندار سانى 36,2 مىڭ ادام (%32,4) جانە 1258 ادام (%1,2) ءىشىنارا جالدامالى جۇمىسكەرلەر بولىپ تابىلادى. سونىمەن قاتار، 29 جاسقا دەيىنگى جاستاردىڭ ۇلەسى 47,4 پايىز بولسا، ايەلدەر 45,1 پايىزدى قۇرايدى.
«2016 -جىلعى 1 -قىركۇيەكتەگى جاعداي بويىنشا جۇمىسپەن قامتۋدىڭ ايماقتىق كەشەندى جوسپارلارىمەن 313 مىڭنان استام ادام قامتىلىپ، ونىڭ 279,8 مىڭ ادامى جۇمىسقا ورنالاستىرىلدى. ونىڭ ىشىندە تۇراقتى جۇمىس ورىندارىنا 139,1 مىڭ ادام، ۋاقىتشا جۇمىس ورىندارىنا 140,7 مىڭ ادام تۇردى»، - دەدى ب. نۇرىمبەتوۆ.
ونىڭ ايتۋىنشا، الەمدىك ەكونوميكادا ورىن العان جاعدايعا بايلانىستى جانە قىزمەتكەرلەردى جۇمىستان بوساتۋ قاۋپىنە قاراماستان، مەملەكەت قابىلداپ وتىرعان شارالار قازاقستاندا جۇمىسسىزدىق كورسەتكىشىن %5 دىق كورسەتكىشتە ۇستاپ وتىرۋعا مۇمكىندىك بەرۋدە.
بۇدان بولەك ول ق ر د س ءا د م جالپىعا ورتاق ەڭبەك قوعامى يدەياسىن حالىق اراسىندا ناسيحاتتاۋ بويىنشا بەلسەندى ءىس- شارالار جۇزەگە اسىرىلىپ جاتقانىن حابارلادى. ونىڭ قاتارىندا بىرنەشە اۋقىمدى شارالار بار.
مينيسترلىك مالىمەتىنشە، جاستار اراسىندا ەلىمىزدىڭ ەكونوميكالىق سۇرانىستارىنا ساي جۇمىسشى كاسىپتەر مەن كاسىپتىك ءبىلىم بەرۋدىڭ بەدەلى مەن تانىمالدىلىعىن ارتتىرۋ ماقساتىندا اعىمداعى جىلعى ءساۋىر ايىنان باستاپ قىركۇيەك ايىنا دەيىن جۇمىسشى ماماندىقتاردىڭ «Worldskills Kazakhstan» ۇلتتىق جانە وڭىرلىك چەمپيوناتتارى وتكىزىلدى. قازاقستاننىڭ بارلىق وڭىرلەرىنەن كەلگەن 700 دەن استام قاتىسۋشىلار مەيرامحانالىق سەرۆيس، كونديتەر ءىسى، شاشتاراز ءىسى، جەلىلىك جانە جۇيەلىك اكىمشىلەندىرۋ، ۆەب- ديزاين، مەحاترونيكا، قۇرعاق قۇرىلىس جانە سىلاقشىلار جۇمىسى، كىرپىش قالاۋ، دانەكەرلەۋ جۇمىستارى، بەزەندىرۋ جۇمىستارى، مەكتەپكە دەيىنگى تاربيە، كيىم ءديزاينى، ەلەكتر مونتاجدىق جۇمىس سالالارى بويىنشا ۇزدىك اتانۋ ءۇشىن بايقاۋعا قاتىسادى.
اتاپ ايتقاندا، جالپىعا ورتاق ەڭبەك قوعامى يدەياسىن حالىق اراسىندا ناسيحاتتاۋ جانە ەڭبەك ادامىنىڭ بەدەلىن ارتتىرۋ ماقساتىندا 2014 -جىلدان باستاپ «ەڭبەك كۇنى» مەرەكەسىن اتاپ ءوتۋ - ماڭىزدى شارالاردىڭ ءبىرى بولىپ تابىلادى. ەلىمىزدىڭ بارلىق ايماقتارىندا قازاقستان ەكونوميكاسىن دامىتۋعا جانە نىعايتۋعا ءوز ۇلەسىن قوسقان ەڭبەك ارداگەرلەرىنە، ەڭبەك اۋلەتتەرىنىڭ وكىلدەرى مەن كاسىبي ماماندارعا قۇرمەت كورسەتىلىپ، ەڭبەك كۇنىنە ارنالعان فورۋمدار وتۋدە.
