كورەرمەن «وگەي جۇرەك» تەلەحيكاياسىنىڭ كەزەكتى بولىمىنەن كەيىن ەسەنتايەۆا تۋرالى ويىن وزگەرتتى - فوتو
جەتىمدەر ماسەلەسىن ءسوز ەتكەن تۋىندىنى كەشەگى كۇنگە دەيىن سىناۋشىلار قاتارى كوپ بولدى.
دەسە دە، كامشات جولدىبايەۆا باستى ءرولدى سومدايتىن «وگەي جۇرەك» تەلەحيكاياسى كورەرمەن كوزايىمىنا اينالىپ ۇلگەردى. كۇن سايىن اتالمىش تەلەحيكايانى اسىعا كۇتەتىن كورەرمەندەر سانى ارتۋدا.
تەلەحيكايانىڭ العاشقى ءبولىمىن YouTube جەلىسىندە تاماشالاعاندار سانى 200 مىڭنان اسقان. بۇل - سۇيىكتى تەلەحيكاياسىن تەلەديداردان كورىپ ۇلگەرمەگەن كورەرمەن سانى عانا. بۇعان دەيىن جۇرت قازاق قىزىن ەكى بىردەي ەركەكپەن سۇيىستىرگەن تەلەحيكايانى قاتال سىنعا العان ەدى. ول تۋرالى الەۋمەتتىك جەلىلەردە ءتۇرلى پوستتار جازىلىپ، قىزۋ تالقىعا سالىندى. كوپشىلىك بيبىگۇلدىڭ (كامشات جولدىبايەۆا) ەكى بىردەي جىگىتپەن سۇيىسكەنىن ەرسى دەپ تاپتى. ەسەسىنە، ەسەنتايەۆانىڭ ەڭبەگىن، جولدىبايەۆانىڭ ونەرىن جوعارى باعالاعان جاندار دا كوپ بولدى.
انالارىنان ەرتە ايىرىلعان اليما مەن بوتاگوزدىڭ بۇل بولىمدە اكەلەرى جۇرەك تالماسىنان قايتىس بولادى. ال ولارمەن ەشقانداي تۋىستىق بايلانىسى جوق بيبىگۇل قىزدارعا قامقورلىق تانىتادى. الايدا قىزدارعا قامقور بولۋ قۇقىعىن سوت بيبىگۇلگە ەمەس، انالارىن ولتىرگەن ادامعا بەرەدى. سەبەبى ول - قىزداردىڭ جالعىز تۋىسى، اكەلەرىنىڭ تۋعان ءىنىسى.
تەلەحيكايانىڭ 8- ءبولىمىن كورەرمەننىڭ باسىم بولىگى كوزىنە جاس الىپ تاماشالاعان. وعان بايان ەسەنتايەۆانىڭ پاراقشاسىندا قالدىرىلعان مىنا ءبىر پىكىرلەر دالەل:
«ەشقاشان فيلم ءۇشىن جىلامايتىنمىن. ءبىراق مىنا ءبولىمدى كورىپ وتىرعاندا باستان-اياق جىلاۋمەن بولدىم»، «تەلەحيكايانى كۇن سايىن اسىعا كۇتەمىن. ال كەشە وكسىپ جىلادىم. اليمانىڭ ويناعانى ۇنايدى، ءار بالانىڭ اتا- اناسى بولسا ەكەن»، «ەرىكسىز جىلايسىڭ، جۇدىرىقتاي جۇرەگى بار ادامنىڭ جىلاماۋى مۇمكىن ەمەس»، «تەلەحيكايا بىتكەنشە توقتاماي جىلادىم»، «جىلادىم، ءسىزدىڭ بارلىق تۋىندىلارىڭىز جوعارى دەڭگەيدە، ماعىنالارى دا ومىرلىك»، «انام ومىردە جوق، ءوزىم انامىن، سوندا دا قاتتى جىلادىم»، «جۇرەكتەن جۇرەككە جەتكىزىپ، ءبىزدىڭ كوڭىلىمىزدى ءبىر جىبىتەسىز».
ايتا كەتەيىك، بايان ەسەنتايەۆا جولدىبايەۆانى ەكى جىگىتپەن جاقىنداسقانى ءۇشىن سىناعاندارعا ءوز جاۋابىن بەرگەن ەدى.
