مەملەكەتتىك قىزمەتكەرلەردىڭ ادەپسىز ارەكەتتەرى تۋرالى ارىزدار ەرەكشە باقىلاۋعا الىنادى
بۇل تۋرالى جەمقورلىققا قارسى ارەكەت ەتۋ جونىنەن ۇلتتىق اگەنتتىك حابارلايدى.
سەبەبى قايتادان قۇرىلعان اگەنتتىك جۇمىسىنىڭ باستى باعىتتارىنىڭ ءبىرى مەملەكەتتىك قىزمەتكەرلەردىڭ ەتيكالىق ءتارتىپ ستاندارتتارىن بۇلجىتپاستان ورىنداۋىن قامتاماسىز ەتۋ بولىپ تابىلادى. وسىعان بايلانىستى اگەنتتىك مەملەكەتتىك قىزمەتكەرلەردىڭ ادەپكە ساي كەلمەيتىن ارەكەتتەرى تۋرالى بەرگەن ارىزدارىن تۇراقتى نەگىزدە تىركەپ وتىرادى. ارىزدارىندا ازاماتتار قىزمەتكەرلەر تاراپىنان ادەتتە قابىلدانعان ادەپتەن تىس قارىم- قاتىناستاردىڭ تۋىندايتىنىنا شاعىمدانادى. بۇعان سىيلىق الۋ، ءتۇرلى ويىن- ساۋىق شارالارىن ۇيىمداستىرتۋ، قىزمەتتىك سۋبورديناتسيانى ساقتاماۋ جاتادى.
جوعارى تۇرعان مەملەكەتتىك ورگان وكىلدەرى تومەن تۇرعان ورگانداردى تەكسەرۋ ماقساتىندا قىزمەتتىك ءىسساپارلار وسى جاعدايلاردىڭ جۇزەگە اسىرىلۋىنا تاپتىرمايتىن كەز بولىپ تابىلادى. سونداي- اق باستىقتاردىڭ تۋعان كۇنى بولعان كەزدە قىزمەتكەرلەردەن اقشا جىرۋ دەرەكتەرى دە كەزدەسەدى. بۇگىندە مۇنداي قۇبىلىس تەك ورتالىقتاعى ەمەس، جەرگىلىكتى جەردەگى مەملەكەتتىك اپپاراتقا دا ءتان. ايتىلعاننىڭ بارلىعىنا بايلانىستى مەملەكەتتىك قىزمەت جانە جەمقورلىققا قارسى ارەكەت ەتۋ جونىنەن اگەنتتىك مەملەكەتتىك قىزمەتكەرلەردى ەتيكالىق نورمالار مەن جەمقورلىققا قارسى شەكتەۋلەردى قاتاڭ ۇستانۋعا شاقىرادى.
www.24.kz
