ۇزىناعاشتاعى قاندى وقيعاعا قاتىستى كۇدىكتىلەردىڭ تۋىستارى پىكىرىن ءبىلدىردى

 استانا.قازاقپارات - الماتى وبلىسىندا ءدۇيىم جۇرتتى شۋلاتقان، ءۇش بىردەي ازاماتتى جاۋىزدىقپەن ءولتىرىپ، مالىن ولجالادى دەگەن كۇدىكتىلەر جايلى ازىرگە تولىق اقپارات ايتىلمادى.

تەك ولاردىڭ تۇرعىلىقتى جەرى مەن اتى- جوندەرى بەلگىلى. ال ولاردىڭ بۇعان دەيىن نەمەن اينالىسىپ، قالاي تىرشىلىك ەتكەندەرى دە كوپشىلىككە بەيمالىم. 31- ارنا كۇدىكتىلەردىڭ اۋىلداستارى مەن اعايىن- تۋىستارىن سوزگە تارتىپ، ولاردىڭ دا پىكىرىن ءبىلىپ كورۋگە تىرىسقان ەدى.

بۇرىنعى امانگەلدى سوۆحوزى، قازىرگى سۇرانشى باتىر اۋىلى بۇگىندە توماعا- تۇيىق. كوشەدە بەيساۋات جۇرگەن ادام جوق، سوزگە ساراڭ، ەشكىم سۇحبات تا بەرمەيدى. اۋىلداستارىنىڭ ارەكەتى ەلدى شوشىتقان سىڭايلى. سۇراستىرا ءجۇرىپ كۇدىكتى تالعاتتىڭ ءۇيىن تاپتىق. 45 جاستاعى ازامات كوپ جىلدان بەرى كولىك جوندەپ كۇنەلتكەن ەكەن. سوڭعى كەزدەرى ەپتەپ مال ساۋداسىمەن اينالىسىپتى. ءۇش بالانىڭ اكەسى. تۋعان- تۋىستارى ەڭبەكقور تالعاتتىڭ قاندى وقيعاعا قاتىسى بارىنا سەنبەيدى. ءبىراق ەشبىرى سۇحبات بەرىپ، اشىلىپ سويلەسپەدى.

ال ەكىنشى كۇدىكتى مۇرات وڭالبايەۆتىڭ اناسى بالام الدەكىمدەردىڭ ارباۋىنا ءتۇسىپ قالدى دەپ شىرىلداپ وتىر.

"سول كۇنى، بازار كۇنى كازتسيكتە ءبىر جىگىتتىڭ ولىمىنە ايەلىمەن ءبارىمىز بارىپ كەلە جاتقانىمىزدا تەلەفونى شىرىلدادى. بىرەۋ شاقىردى، 1 مەن 2 ءنىڭ ورتاسى نە 2 مەن 3 ءتىڭ ورتاسى. مەن بازاردان مال الىپ كەلە جاتىر ەدىم كامازبەن، ءۇيىمنىڭ جانىنا كەلىپ ءتۇسىرىسىپ جىبەرشى دەدى. اۋىلدىڭ بالاسى، اعايىن ادامبىز، سوسىن بالام جارايدى دەدى. ءبىزدى ءتۇسىرىپ سوعان باردى، ارتى وسى بولدى. ودان ارى قاراي نە بولعانىن، قالاي بولعانىن بىلمەيمىن"، - دەيدى مۇراتتىڭ اناسى.

41 جاستاعى مۇرات وڭالبايەۆ - ءۇشىنشى توپتاعى مۇگەدەك ەكەن. ءبىر كوزى كەمتار. ونىڭ دا ءۇش بالاسى بار. بۇعان دەيىن قىلمىستىق جاۋاپقا تارتىلماعان. كولىگىمەن ادام تاسىپ كۇنەلتكەن.

"تەك ادام ولتىرەدى دەگەنگە سەنبەيمىن. التىن كورىپ پەرىشتە جولدان تايىپ، ساعان دا بىردەڭە بەرەمىز دەسە سوعان ىلەسىپ كەتتى ما؟ قايدان بىلەيىن. ول تەك ەرۋشى"، - دەيدى مۇراتتىڭ اناسى.

ەلدى ءدۇر سىلكىندىرگەن قاندى وقيعا بۇگىندە ءجىتى تەكسەرىلىپ جاتىر. الايدا، مارقۇم مۇقيات زارىلحاننىڭ تۋعان اعاسى ادال زارىلحان تەپسە تەمىر ۇزەتىن ءۇش جىگىتتى ەكى ادام ءولتىردى دەگەنگە سەنبەيدى.

 "ماشينا دۇيسەنبى كۇنى، 19 كۇنى ورتەنگەن. كەشكى ساعات 9 دان 40 وتكەندە. انا جەردەگى مالشىلار ۇزىناعاشتىڭ روۆد- سىنا زۆونداعان. سوندا ولار نەگە قۋزامايدى؟ ەرتەسىندە تاڭ اتپاي حالىق شىعارادى. ءبىر- اق ادام كورەدى. باسقا ادام كورمەيدى. ول اۋىلدىڭ ۋچاسكوۆىيى قايدا. ونى نەگە جالعىز ادام كورەدى. ماعان عانا نەگە تەلەفون سوعادى. ونى نەگە ءبىر اۋدان كورمەيدى"، - دەيدى مۇقيات مارقۇمنىڭ اعاسى ادال زارىلقان.

جالپى مال باققان شارۋالار مەن ەت ساتقان ساۋداگەرلەردى توناۋ، ءولتىرۋ سەكىلدى قىلمىستار الماتى ايماعىندا ءجيى بولادى. الماتىلىق مالشىلار مەن ساۋداگەرلەرگە بىرنەشە مارتە شابۋىل دا جاسالدى. سوندىقتان بازار جاعالاعان ۇيىمداسقان قىلمىستىق توپ بولۋى مۇمكىن دەگەن اڭگىمە بۇگىندە ەل ىشىندە جەلدەي ەسىپ ءجۇر. قولعا تۇسكەن ەكى كۇدىكتىنىڭ دە جاقىندارى وسى ۇستانىمدا. ولار قايرات پەن تالعات الدەكىمنىڭ الداۋىنا ءتۇسىپ، ارانداپ قالدى. شەلەك جالاعاندار تۇتىلىپ، ايران ىشكەندەر قۇتىلىپ كەتپەسە دەپ الاڭدايدى.