ەلباسى: قازاق راديوسى ەل تاۋەلسىزدىگىن تۇعىرلى ەتۋگە قالتقىسىز قىزمەت ەتىپ كەلە جاتىر - فوتو
سالتاناتتى شاراعا ق ر اقپارات جانە كوممۋنيكاتسيالار ءمينيسترى داۋرەن ابايەۆ قاتىسىپ، ەلباسى نۇرسۇلتان نازاربايەۆتىڭ قۇتتىقتاۋ حاتىن تاپسىردى.
«سىزدەر ءبىر عاسىرعا جۋىق ۋاقىت بويى جاڭالىقتىڭ جارشىسى بولىپ، حالقىمىزدى تانىمى تەرەڭ، مازمۇنى زور حابارلارمەن سۋسىنداتىپ كەلەسىزدەر. راديو قابىرعاسىندا ءار جىلدارى ءبىرتۋار تۇلعالار ەڭبەك ەتتى. راديونىڭ تورقالى تويى قاستەرلى تاۋەلسىزدىگىمىزدىڭ 25 جىلدىعىمەن تۇسپا-تۇس كەلىپ وتىر. تاۋلىك بويى حابار تاراتاتىن قازاق راديوسى - ەل تاۋەلسىزدىگىن تۇعىرلى ەتۋگە قالتقىسىز قىزمەت ەتىپ كەلە جاتقان بۇقارالىق اقپارات قۇرالدارىنىڭ ءبىرى. ەل بىرلىگىن نىعايتۋعا لايىقتى ۇلەس قوسۋدا. بۇگىنگى مەرەيلى شاقتا زور دەنساۋلىق، بەرەكە- بىرلىك پەن شىعارماشىلىق تابىستار تىلەيمىن. جاعىمدى جاڭالىقتاردىڭ جارشىسى بولىپ، ماڭگىلىك ەلدىڭ مىزعىماس قۇندىلىقتارىن بارشا حالىقتىڭ جۇرەگىنە جەتكىزە بەرىڭىزدەر!»، دەلىنگەن ەلباسى قۇتتىقتاۋىندا.
اتاپ ايتقاندا، راديوفەستيۆالعا قازاقستان وڭىرلەرىنەن جانە تۇركيادان، بەلارۋس ەلىنەن، رەسەيدەن، ۋكراينادان 60 ءانشى قاتىسىپ، ونىڭ 16 سى جەڭىمپاز اتاندى.
سونىمەن، «ۇزدىك توپ» اتالىمىندا «رينگو» توبى، «جىگىتتەر اراسىنداعى ۇزدىك جەكە ورىنداۋشى» اتالىمىندا ايقىن تولەپبەرگەن جانە «جىلدىڭ ۇزدىك پاتريوتتىق ءانى» اتالىمىندا نۇرعالي تۇرلىبەكوۆ («قازاقستان» ءانى)، «ۇزدىك ەسترادالىق ورىنداۋشى» - ءمولدىر اۋەلبەكوۆا، «ۇزدىك ەتنو- ەسترادالىق ورىنداۋشى» رەتىندە ارداق بالاجانوۆا ماراپاتتالدى.
بۇدان بولەك، ءداستۇرلى ونەر وكىلدەرىنەن ارمات يسلامعاليەۆ «جىگىتتەر اراسىنداعى ۇزدىك ءداستۇرلى ورىنداۋشى» اتالىمىن، ءزۇلفيا بايمىرزا «قىزدار اراسىنداعى ۇزدىك ءداستۇرلى ورىنداۋشى اتالىمىن يەلەندى.
ال «ۇزدىك دومبىراشى» اتىلىمىندا جاراس ساتىبالديەۆ، «ۇزدىك قوبىزشى» اتالىمىندا سايان اقمولدا، «ۇلتتىق اسپاپتىق ۇجىم» اتالىمىندا «سارى ارقا» ۇلت اسپاپتار انسامبىلى، «ۇزدىك ەتنو-روك توبى» اتىلىمىندا « ۇلىتاۋ» روك توبى جەڭىمپاز بولدى.
مۇنىمەن قوسا، «جاڭا ەسىم» اتالىمىندا باشقۇرتستاننان قاتىسقان مارسەل كۋتۋيەۆ (ش. قالداياقوۆ «انا تۋرالى جىر»)، ۋكرايندىق يان كوستىركو (ە. حاسانعاليەۆ «بوزتورعايىم»)، رەسەيلىك ۇمىتكەرى چينگيس لي (ە. حاسانعاليەۆ «اينالايىن)، بەلارۋس ەلىنەن قاتىسۋشى وكسانا ۆويتەشيك («سۇيگەن جۇرەك»)، سونداي-اق تۇركيا مەملەكەتىنەن قاتىسۋشى جەم گۇردال (ا. جۇبانوۆ، «قارلىعاش» ) ۇزدىك تانىلدى.
قازاق راديوسىنىڭ پروديۋسەرى اينۇر سارسەنبەكوۆا «ۇلى دالا داۋىسى» - راديوفەستيۆال رەتىندە قازاق راديوسىنىڭ ەفيرىندە 2012 -جىلدان باستاۋ العانىن ايتا كەلە، ونىڭ ماقساتى - قازاق مۋزىكاسىنىڭ زاماناۋي، باسەكەگە قابىلەتتى ءتولتۋمالىق دىبىسىن حالىقارالىق دەڭگەيگە ناسيحاتتاۋ جانە تىڭداۋشىلارىنىڭ تالعامىنان شىققان شىعارمالار ارقىلى ورىنداۋشىلىق ونەردى ماراپاتتاۋعا نەگىزدەلگەنىن اتاپ ءوتتى.
