تەكتى وزگەرتۋدىڭ تاۋقىمەتى

استانا. قازاقپارات - كەڭەس وكىمەتى كەزىندە اۋىلدىق كەڭەستە وتىرعان وزگە ۇلت وكىلدەرىنىڭ كەسىرىنەن تالايىمىزدىڭ اتى-ءجونىمىز بۇرمالانىپ، ءالى كۇنگە سونىڭ زاردابىن تارتۋدامىز. ماسەلەن، اتا- انامنىڭ ازان شاقىرىپ قويعان ەرداۋلەت اتىم «ەرداۆلەت» بولىپ جازىلىپ كەتكەن. مەن مۇنى تاۋەلسىزدىك العان جىلدارى جوندەپ، ءبىرجولاتا «وۆ» - تان دا قۇتىلعان بولاتىنمىن. وسىمەن بىتكەن بولار دەپ جۇرسەم...

جاقىندا ءبىرىنشى سىنىپقا بارعان نەمەرەمە اپايى: «تەگىڭدى وزگەرت، نە قازاقشا، نە وزبەكشە ەمەس. ايتىلۋى قيىن ەكەن»، دەگەندى جۇقالاپ جەتكىزىپتى. سويتسەم، نەمەرەمنىڭ تەگى «ەرداۆلەت» ەكەن. سالىپ ۇرىپ نەكە سارايىنا بارايىن. ونداعى ينسپەكتور قىز ءۋاجىمدى تىڭداپ: «نيەتىڭىز دۇرىس، ول ءۇشىن وزىڭىزدەن باستاۋ كەرەك. سونان سوڭ ۇلىڭىزعا كوشەمىز، ال نەمەرەلەرىڭىز سوڭىنان. ول ءۇشىن ءوزىڭىزدىڭ تۋۋ تۋرالى كۋالىگىڭىزدى اكەلەسىز»، دەگەن سوڭ جەردىڭ شالعايلىعىنا قاراماستان ايتقان بۇيىمتايىن تاۋىپ كەلدىم.

كۋالىكتى ءارى- بەرى توڭكەرىپ كورگەن ينسپەكتور:

- ەندى اكە- شەشەڭىزدىڭ تۋۋ تۋرالى كۋالىكتەرىن اكەلىڭىز، - دەگەنىندە شارت كەتتىم.

- تەگىن وزگەرتەتىن نەمەرەمە سۇيەكتەرى الدەقاشان قۋراپ كەتكەن مەنىڭ اكە-شەشەمنىڭ نە قاتىسى بار. اينالايىن-اۋ، مىناۋىڭ قىپ-قىزىل تەكتى وزگەرتۋ ەمەس، اتا-تەكتى تۇگەندەۋ بولىپ كەتتى عوي. 40 جىل بۇرىن قايتىس بولىپ كەتكەن اكەمنىڭ تۋۋ تۋرالى كۋالىگىن قايدان تابامىن، - دەسەم:

- بىزدە زاڭ سولاي! - دەگەن جاۋابىن ەستىدىم.

وسى ۋاقىتقا دەيىن تالاي قىزىقتى كورىپ ەدىم، ءدال مىناداي «قىزىقتى»، قىزىقتى ەمەس-اۋ، «شىجىقتى» ءبىرىنشى كورۋىم. تەگىن وزگەرتۋدىڭ مۇنداي تاۋقىمەتى بارىن بىلەتىندەر سودان كەيىن ەكەن عوي، «وۆ» پەن «وۆا» - دان اجىراماي جۇرگەندەرى. ەگەر ينسپەكتور ايتقانداي، انىق زاڭ سولاي بولسا، وندا بۇل دەگەنىمىز تەكتى وزگەرتۋدەگى تازا كەدەرگى ەمەس پە؟

سۇلتان ەرداۋلەت وڭتۇستىك قازاقستان وبلىسى،

سايرام اۋدانى

«ەگەمەن قازاقستان»