ساكەن مايعازيەۆ: بولاشاقتا مادەنيەت ءمينيسترى بولعىم كەلەدى
ءبىر سوزىندە ول وزگە ارىپتەستەرى سەكىلدى دەپۋتات بولۋدى كوزدەمەيتىنىن، الايدا بولاشاقتا مادەنيەت ءمينيسترى بولعىسى كەلەتىنىن ايتتى.
مايعازيەۆ «كومپرومات» باعدارلاماسى بارىسىندا تەلەجۇرگىزۋشى گۇلبارشىن زايروۆانىڭ «جوعارعى جاقتان بۇيرىق نە ۇسىنىس تۇسسە، دەپۋتات بولۋعا كەلىسەسىز بە؟» دەگەن ساۋالىنا:
«دەپۋتات بولۋ ءۇشىن ءبىلىم كەرەك، ءىلىم كەرەك، سانا كەرەك. سول سەبەپتى مەن دايىن ەمەسپىن دەپ ويلايمىن. ونەر سالاسىندا قىزمەت اتقارىپ جۇرگەننەن كەيىن ەگەر ونەرگە پايداڭ تيەدى دەپ ونەر سالاسىنداعى قىزمەتكە شاقىراتىن، ۇسىناتىن بولسا، ويلانار ەدىم»، - دەپ جاۋاپ بەردى.
ءانشىنىڭ بۇل ءسوزىن نازارعا العان تەلەپروديۋسەر گۇلنۇر ماماسساريپوۆا توسىننان «شابۋىل» جاسادى. «بولاشاقتا مادەنيەت ءمينيسترى بولعىڭ كەلە ما؟» دەپ ساۋال تاستاعان وعان ساكەن مايعازيەۆ ويلانباستان: «بولعىم كەلەدى» دەپ جاۋاپ بەردى. ونىڭ سەبەبىن بىلايشا ءتۇسىندىردى:
«وزەكتى ماسەلەلەر وتە كوپ. ەڭ الدىمەن، كەڭەسشىلەر قوعامىن ۇيىمداستىرعان بولار ەدىم. سەبەبى ەسترادانى سارالاپ، ساراپتاۋ كەرەك».
ودان كەيىن ءانشى ۇستازدىققا قالاي كەلگەنىن اڭگىمەلەپ بەردى.
«ءوز باسىم ەسترادا جانە سيرك كوللەدجىنە ءدارىس بەرۋگە شاقىرتىلعان كەزدە مەن شىنىندا ۇستاز بولامىن، بىرەۋدىڭ داۋسىن قويامىن دەپ مۇلدەم ەلەستەتكەن جوقپىن. شىنىن ايتقاندا مەنى ماجبۇرلەدى دەپ ايتۋعا دا بولادى. بيبىگۇل نۇرعالي قىزى شاقىرىپ الىپ: «نەگە ساباق بەرمەيسىڭ؟» - دەگەن كەزدە مەن ءالى ءوزىمنىڭ دە ۇيرەنەرىم كوپ ەكەنىن ايتتىم»، - دەدى ول.
سول كەزدە ساكەنگە رەنجىگەن بيبىگۇل ءنۇسىپجانوۆا:
«بار بىلەتىنىڭدى ۇيرەتەسىڭ. ەگەر سەن باس تارتساڭ، مەدەۋ ارىنبايەۆ باس تارتسا، جاستارعا كىم ۇلگى بولىپ، ساباق بەرەدى؟» - دەپ رەنجىگەن ەكەن. مايعازيەۆ وعان دەيىن ەرجان قوسبارماقوۆتىڭ تاراپىنان ۇستازدىق ەتۋگە ۇسىنىس تۇسكەن كەزدە ءۇزىلدى-كەسىلدى باس تارتقانىن مالىمدەدى.
