قازاق راديوسى الداعى ۋاقىتتا دا بيىكتەن تابىلادى - نۇرجان مۇحامەدجانوۆا
«قۇرمەتتى قوناقتار، قازاق راديوسىنىڭ ارداگەرلەرى جانە ارىپتەستەر! ەلىمىزدەگى ەلەكتروندى اقپارات قۇرالدارىنىڭ قاراشاڭىراعى - قازاق راديوسىنىڭ ەفيرگە شىققانىنىڭ 95 جىلدىعى قازاقستان رەسپۋبليكاسى تاۋەلسىزدىگىنىڭ 25 جىلدىعىمەن تۇسپا- تۇس كەلىپ وتىر. وسى قوس مەرەكەمەن بارشاڭىزدى قۇتتىقتايمىن! تاۋلىك بويى ەفيرگە شىعاتىن قازاق راديوسى اۋديتورياسىنىڭ اۋقىمى جاعىنان قازاقستانداعى راديوستانسيالاردىڭ ىشىندەگى ابسوليۋتتى كوشباسشى. قازاق راديوسىنىڭ بيىلعى مەرەكەلىك جىلى بۇقارالىق اقپارات قىزمەتكەرلەرى كۇنىنە وراي قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ العىس حاتىمەن ماراپاتتالۋى ۇجىمنىڭ ەڭبەگىنە بەرىلگەن جوعارى باعا دەپ بىلەمىز. راديومىز الداعى ۋاقىتتا دا وسى بيىكتەن تابىلادى دەپ سەنەمىز. ەندەشە، مەملەكەتتىڭ اۋە تولقىنىنداعى ءۇنى اسقاقتاي بەرسىن! قازاق راديوسىنىڭ 95 جىلدىق تويى قۇتتى بولسىن!»، - دەدى «قازاقستان» ر ت ر ك» ا ق باسقارما ءتورايىمى نۇرجان مۇحامەدجانوۆا.
ءوز كەزەگىندە جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى، فيلولوگيا عىلىمدارىنىڭ دوكتورى، پروفەسسور نامازالى وماشەۆ عاسىرعا جۋىق ۋاقىت اياسىندا قازاق راديوسى تالاي تاريحتى باستان وتكەرگەنىن اتاپ ءوتتى. وسى رەتتى ول قازاق راديوسى - بارشا قازاقتىڭ رۋحاني تىرەگى ەكەنىن ايتتى.
«كەشەگى وتكەن ومىرىمىزدە، بۇگىنگى باعىندىرعان بيىكتەرىمىزدە بولسىن سالت- ءداستۇرىمىز بەن ۇلت رۋحانياتىن ۇلىقتاۋ جولىندا، ەلدىك ماسەلەنى كۇن تارتىبىنە قويا بىلۋدە، اقپاراتتىق زاماندا قوعامدىق پىكىردى دۇرىس جەتكىزە بىلۋدە قازاق راديوسىنىڭ ەڭبەگى زور»، - دەدى ن. وماشەۆ.
ايتا كەتەيىك، شاراعا مەملەكەت جانە قوعام قايراتكەرلەرى، زيالى قاۋىم وكىلدەرى، وتاندىق ب ا ق جەتەكشىلەرى مەن ارداگەر جۋرناليستەر، سونىمەن قاتار، قازاق راديوسىمەن ارىپتەستىك بايلانىس ورناتقان شەتەلدىك تەلەراديو مەكەمەلەرىنىڭ جەتەكشىلەرى قاتىسۋدا.
ءتۇپ- توركىنى سوناۋ 1921 -جىلدىڭ قازان ايىنان باستالاتىن قازاق راديوسى تالاي تاريحتى باستان وتكەردى. سول كەزدەن باستاپ ورىنبور قالاسىنان بۇكىل رەسپۋبليكاعا تارالا باستادى. قازاق راديوسى حابارلاردى بىرتىندەپ تاقىرىپ بويىنشا توپتاستىردى، دەربەس جانە تەكتەس اقپاراتتارعا ءبولۋ ناتيجەسىندە جۋرناليستىك ەلەكتەن وتكىزدى. ءسويتىپ، رەسپۋبليكالىق ەفيردەن ۇندەۋلەر، شاقىرۋلار، دەرەكتەر، نۇسقاۋلار، مالىمەتتەر، جاڭالىقتار ۇزبەي ءجيى بەرىلەتىن بولدى. 1926 -جىلدىڭ 3 -قازانىنان باستاپ قىزىلوردا قالاسىندا قازاق راديوسى ءوز حابارلارىن تۇراقتى بەرۋدى ودان ءارى جالعاستىردى. الماتى راديوستانتسياسى 1931 -جىلى 1 -مامىردا اشىلدى. 30- جىلدار قازاق راديوسىنىڭ دامۋ جىلدارى بولدى.
راديوجۋرناليستيكا جولعا قويىلىپ، راديو بۇقارالىق اقپارات قۇرالدارىنىڭ ءبىرى رەتىندە نىعايىپ، بەكىدى. بۇگىندە قازاق راديوسى تاۋلىك بويى 9 تىلدە حابار تاراتادى: قازاق، ورىس، نەمىس، اعىلشىن، كورەي، ۇيعىر، ازەربايجان، تۇرىك جانە تاتار تىلىندە. اپتاسىنا 148 حابار ەفيرگە شىعادى.
اۆتور: رۋسلان عابباسوۆ
