الەۋمەتتىك جەلىدەگى ۆيدەودان كەيىن قاپشاعايدىڭ اكىمى جۇمىستان كەتتى

تالدىقورعان. قازاقپارات - قاپشاعاي قالاسىنىڭ اكىمى ءساتجان قيقىموۆ جۇمىستان كەتتى. بۇل تۋرالى «قازاقپارات» تىلشىسىنە الماتى وبلىستىق اكىمدىگىنىڭ باسپا ءسوز قىزمەتىنەن حابارلادى.

ەسكە سالا كەتەيىك، بۇعان دەيىن قاپشاعاي قالاسىنىڭ اكىمى ءساتجان قيقىموۆتىڭ ازاماتتاردى قابىلداۋ بارىسىندا كەلۋشىلەردىڭ بىرىمەن دورەكى سويلەسكەن ۆيدەوسى جاريالانعان ەدى. الەۋمەتتىك جەلىدە تارالعان بەينەتاسپادان كەيىن اكىم جۇمىستان ءوز ەركىمەن كەتۋ جونىندە ءوتىنىش جازعانى ايتىلعان بولاتىن.

سونىمەن قاتار، قاپشاعاي اكىمى ءساتجان قيقىموۆ پەن ونىڭ الدىنا كەلۋشىلەردىڭ اراسىنداعى اڭگىمە تۇسىرىلگەن داۋلى بەينەروليك بويىنشا تەكسەرۋ الماتى وبلىسى اكىمدىگىنىڭ باقىلاۋىنا الىنعان بولاتىن.

«قاپشاعاي قالاسىنىڭ اكىمى ءساتجان قيقىموۆتىڭ قىزمەتتىك ادەپ نورمالارىن بۇزۋىنا بايلانىستى، بۇل وقيعا قازاقستان رەسپۋبليكاسى پرەزيدەنتىنىڭ 2015 -جىلعى 29 جەلتوقسانداعى №152 جارلىعىمەن بەكىتىلگەن مەملەكەتتىك اكىمشىلىك قىزمەتشىلەرگە تارتىپتىك جازا قولدانۋ ەرەجەلەرىنىڭ 25-تارماعىنا سايكەس الماتى وبلىسى ادەپ جونىندەگى كەڭەستىڭ قاراۋىنا جىبەرىلدى. ونى قاراۋ ناتيجەسى تۋرالى قوسىمشا حابارلانادى»، - دەلىنگەن اقپار حاتتا.

 سامال قابىشيەۆا