بايمەنوۆ مەملەكەتتىك قىزمەتكەرلەردى كەڭسەدە تۇنگە دەيىن وتىرعىزباۋدىڭ جولىن ۇسىندى

استانا. قازاقپارات - مەملەكەتتىك ورگانداردىڭ ءبىرازىندا قاعازباستىلىقتىڭ شىن مانىندە مازمۇندىق ولشەمى جوق. بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا استاناداعى مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەت ءتوراعاسى ءاليحان بايمەنوۆ ءمالىم ەتتى.

 «مەملەكەتتىك قىزمەتكەرلەردىڭ جۇمىس ۋاقىتى اياقتالسا دا، كەڭسەدە تۇنگە دەيىن قالۋى - مەملەكەتتىك ورگانداردىڭ مەنەدجمەنتىندەگى وزەكتى ماسەلەنىڭ ءبىرى. بۇل رەتتە بىرنەشە ماسەلە بار. بىرىنشىدەن، لاۋازىم يەلەرى اراسىندا جاۋاپكەرشىلىكتى شەكتەۋدى جەتىلدىرۋ كەرەك. مينيسترلىكتىڭ ىشىندە كىم ستراتەگيالىق باقىلاۋمەن اينالىسادى، كىم كۇندەلىكتى باسقارۋمەن اينالىسادى دەگەن مينيستر ورىنباسارلارى مەن جاۋاپتى حاتشى اراسىنداعى اراجىكتى ودان ارى ناقتىلاۋ كەرەك.

 ەكىنشىدەن، مەملەكەتتىك ورگانداردىڭ ءبىرازىندا ءالى دە قاعازباستىلىق باسىم جانە وسى قاعاز اينالىمىن تالدايتىن بولساڭىز، ونىڭ ءبىرازى وزىنەن ءوزى تۋىنداعان، شىن مانىندە مازمۇندىق ولشەمى جوق قاعازدار. سوندىقتان قاداعالاۋ ءارى باقىلاۋ جۇيەسىندە جوعارى ورگاننىڭ تومەنگى ورگاندى قاداعالاعاندا جاي عانا فورمالدى ەمەس، ستراتەگيالىق ناتيجەلەرگە قول جەتكىزۋگە ەكپىن قويىلۋى كەرەك. بۇل الەمدىك ۇدەرىس»، - دەدى ءا. بايمەنوۆ.

ونىڭ سوزىنە قاراعاندا، كەيبىر لاۋازىم يەلەرى جۇمىستان كەيىن جينالىستار وتكىزگەندى ۇناتادى. وسى رەتتە بۇل جينالىستاردىڭ دا ناتيجەلىلىگىنە نازار اۋدارۋ قاجەت.

«مەملەكەتتىك ورگانداردىڭ باسشىلار ءۇشىن مەنەدجمەنت، ونىڭ ۇستىنە جوبالاۋ مەنەدجمەنتى، ۋاقىت مەنەدجمەنتى سەكىلدى بىلىكتىلىكتەرىن كوتەرۋ كۋرستارىن وتكىزۋ كەرەك دەپ ويلايمىن. ەگەر مەملەكەتتىك قىزمەتكەرلەر تۇنگى ساعات 10-11-گە دەيىن جۇمىس ىستەيتىن بولسا، ولاردىڭ جۇمىس ۋاقىتىنداعى ەڭبەك ونىمدىلىگى كۇرت تومەندەيتىنىن زەرتتەۋلەر انىق كورسەتىپ وتىر. ولار 6-7 ساعاتتا جاسايتىن جۇمىسىن اتقارۋعا قاۋقارسىز بولادى. ول ءۇشىن قىزمەتكەرلەردى ناقتى ىسكە جۇمىلدىرا ءبىلۋ كەرەك. بۇل مەملەكەتتىك ورگانداردىڭ ىشىندەگى مەنەدجمەنتتى جەتىلدۋرۋگە قازىر باستى نازار اۋدارۋ كەرەك ەكەنىن جانە مەملەكەتتىك قىزمەتتەگى كورپوراتيۆتىك مادەنيەتتى جەتىلدىرۋدىڭ ماڭىزدىلىعىن اڭعارتۋدا. سونىمەن قاتار قاراماعىنداعى ساراپشىلاردىڭ ءبىلىمىن شەشىم قابىلداعاندا دۇرىس پايدالا بىلۋگە ءمان بەرۋ كەرەك»، - دەدى ول.

ءسوز سوڭىندا ءا. بايمەنوۆ جوعارىدا اتالعان قادامدار ارقىلى قاجەتتى جۇيەلەردى جەتىلدىرۋ ناتيجەسىندە مەملەكەتتىك قىزمەتتىڭ بەدەلىن كوتەرۋگە ىقپال ەتەتىنىن اتاپ ءوتتى.

اۆتور: رۋسلان عابباسوۆ