ون ەلدىڭ ماگيسترانتتارى مەن دوكتورانتتارى تۇركى اكادەمياسىنىڭ جۇمىسىمەن تانىستى
كەزدەسۋدە TWESCO باسشىسى مەكتەپ تۇلەكتەرىنە - قازاقستان، ازەربايجان، بەلارۋس، گەرمانيا، گرۋزيا، قىرعىزستان، تۇركيا، وزبەكستان، پولشا جانە ۋكراينادان كەلگەن ماگيسترانتتار پەن دوكتورانتتارعا اكادەميانىڭ قىزمەتى جانە كەلەشەك جوسپارلارى جونىندە اڭگىمەلەپ بەردى. سونداي- اق كەزدەسۋگە تۇركى كەڭەسى اقساقالدار كەڭەسىنىڭ مۇشەسى ءادىل احمەتوۆ، ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ وكىلەتتى كەڭەس ءتوراعاسى مۇسا يىلدىز، ەۋرازيا عىلىمي- زەرتتەۋ ينستيتۋتىنىڭ ديرەكتورى نيەۆزات شيمشەك پەن اكادەميا قىزمەتكەرلەرى قاتىستى.
حالىقارالىق تۇركى اكادەمياسى، قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ ەۋرازيا عىلىمي- زەرتتەۋ ينستيتۋتى مەن تۇركيا پرەمەر- ءمينيسترى جانىنداعى شەت ەلدەگى تۇرىكتەر جانە تۋىس حالىقتار جونىندەگى باسقارمامەن بىرلەسىپ ۇيىمداستىرىلعان جازعى مەكتەپكە بيىل 20 تالاپكەر قابىلدانعان.
جازعى مەكتەپتىڭ وقۋ باعدارلاماسى شەڭبەرىندە ولار تۇركىتىلدەس ەلدەردىڭ ەكونوميكالىق ينتەگراتسياسى، كولىك جانە ينفراقۇرىلىم جوبالارى، ەنەرگەتيكا جانە سۋ قاۋىپسىزدىگى ماسەلەلەرى، كاسپيي تەڭىزىنىڭ قۇقىقتىق مارتەبەسى جانە ايماقتىق ىنتىماقتاستىقتىڭ بولاشاعى، سونداي- اق ەۋرازيادا قاۋىپسىزدىك ماسەلەلەرى تاقىرىبىندا دارىستەر تىڭدادى.
19 - قىركۇيەك كۇنى الماتىدا باستالعان مەكتەپ باعدارلاماسى بويىنشا ىزدەنۋشىلەرگە ا ق ش، ازەربايجان، قازاقستان، رەسەي مەن تۇركيادان كەلگەن ءوز سالاسىنىڭ ساراپشى ماماندارى ءتۇرلى تاقىرىپتار بويىنشا لەكسيا وقىپ، پىكىر الماستى.
كەزدەسۋ سوڭىندا جازعى مەكتەپ تۇلەكتەرى اكادەميانىڭ كىتاپحانا قورىمەن تانىسىپ، تۇركى حالىقتارى مۋزەيىن ارالاپ كوردى. ولارعا اكادەميا دايىنداپ باسقان قۇندى باسىلىمدار تارتۋ ەتىلدى.
ايتا كەتۋ كەرەك، جازعى مەكتەپتى تابىستى اياقتاعان قاتىسۋشىلار ءوز سالاسىنداعى ءبىلىمى مەن تاجىريبەسىن ارتتىرىپ قانا قويماي، استاناداعى قازاقستاننىڭ ىشكى جانە سىرتقى ساياساتىنا باعىت بەرەتىن ىرگەلى ۇيىمداردى ارالاپ، جۇمىسىمەن تانىسۋعا مۇمكىندىك الدى.
