سينگاپۋر مەملەكەتتىك مەكەمەلەردى جەكەشەلەندىرۋدەگى تاجىريبەسىن قازاقستانمەن بولىسۋگە ءازىر

استانا. قازاقپارات - سەنات ءتوراعاسى قاسىم- جومارت توقايەۆ استاناعا ساپارمەن كەلگەن سينگاپۋر رەسپۋبليكاسىنىڭ قۇرمەتتى اعا ءمينيسترى، بۇرىنعى پرەمەر-ءمينيسترى، پارلامەنتتىڭ دەپۋتاتى گو چوك تونگپەن كەزدەستى.

ق. توقايەۆ قازاقستاندا سينگاپۋر جوعارى دەڭگەيدە دامىعان، كوپ ۇلتتى مەملەكەت رەتىندە شىنايى قۇرمەتكە يە ەكەنىن اتاپ ءوتتى. سينگاپۋردىڭ تۇڭعىش پرەمەر- ءمينيسترى لي كۋان يۋ 1991 -جىلى قازاقستانعا ساپارى، سونداي-اق پرەزيدەنت نۇرسۇلتان نازاربايەۆ 1996 جانە 2003 -جىلدارى سينگاپۋرعا ساپارلارى ەكىجاقتى بايلانىستاردىڭ بەرىك نەگىزىن قالادى، سونداي- اق الدىڭعى ساپتاعى مەملەكەتتى قۇرۋدا سينگاپۋر تاجىريبەسىن مۇقيات زەردەلەۋدىڭ مۇمكىندىگىنە يە بولدى.

ءتوراعا قازاقستاننىڭ ساياسي جۇيەسىندەگى سەناتتىڭ ءرولى، سونداي- اق ەلىمىزدەگى بەس ينستيتۋتتىق رەفورمانى ىسكە اسىرۋداعى ۇلت جوسپارىنىڭ ورىندالۋى تۋرالى اڭگىمەلەدى.

سەنات ءتوراعاسىنىڭ ساۋىردەگى سينگاپۋرعا ساپارى بارىسىندا جاڭا دەڭگەيگە كوتەرىلگەن ەكىجاقتى پارلامەنتارالىق بايلانىستار كەزدەسۋ بارىسىندا جوعارى باعاعا يە بولدى. قازاقستاندا پارلامەنت ءتوراعاسى حاليما ياكوب باستاعان سينگاپۋردىڭ جاۋاپ رەتىندەگى ساپارى كۇتىلۋدە.

سينگاپۋرلىق ساياساتكەر ءوز كەزەگىندە قازاقستان ورتالىق ازياداعى اسا ماڭىزدى مەملەكەت ەكەنىن، وعان سينگاپۋردىڭ نەگىزىن سالۋشى لي كۋن يۋ نازار اۋدارعانىن اتاپ ءوتتى. گو چوك تونگتىڭ ايتۋىنشا، ونىڭ استاناعا ساپارىنىڭ ماقساتى اسەان، قىتاي جانە ءۇندىستان ايماعىندا باسىم شوعىرلانعان سينگاپۋرلىق بيزنەستىڭ نازارىن قازاقستانعا اۋدارۋ بولىپ تابىلادى. بۇل تۇرعىدا «ەكسپو-2017» حالىقارالىق كورمەسى زور مۇمكىندىكتەر تۋعىزادى. قۇرمەتتى اعا مينيستر ەكى ەلدىڭ بيزنەس سالاسىنداعى دەلەگاتسيالارىنىڭ الماسۋلارىنا ىقپال ەتۋدى ماڭىزدى دەپ سانايدى. سونىمەن قاتار سينگاپۋر مەملەكەتتىك مەكەمەلەردى جەكەشەلەندىرۋدى جۇزەگە اسىرۋداعى تاجىريبەسىمەن بولىسۋگە ءازىر.

مەيماننىڭ پىكىرىنشە، ساياسي ينستيتۋتتاردى نىعايتۋدى، سالىق جۇيەسىن جانە باسقا دا باعىتتاردى جەتىلدىرۋدى بىلدىرەتىن «جۇمساق ينفراقۇرىلىم» («soft infrastructurە» ) سالالارىن دامىتۋدا ەكى ەلدىڭ مەملەكەتتىك اپپاراتتارى اراسىنداعى ىنتىماقتاستىقتىڭ ماڭىزى زور. وعان «نازاربايەۆ ۋنيۆەرسيتەتى» مەن لي كۋن يۋ اتىنداعى مەملەكەتتىك ساياسات مەكتەبى اراسىنداعى ارىپتەستىك ءوزارا ءىس- قيمىلدىڭ تاماشا ۇلگىسى بولىپ تابىلادى.

گو چوك تونگ سونىمەن قاتار سينگاپۋر تاراپى قىتايلىق «ءبىر بەلدەۋ، ءبىر جول» باستاماسى ارقىلى ەكى ەكونوميكانىڭ ءوزارا ءىس- قيمىل مۇمكىندىكتەرىن زەردەلەپ جاتقانىن حابارلادى.