قازاقستان مەن قىتايدىڭ ءتارتىپ ساقشىلارى شەكارا ماڭىنداعى قاۋىپسىزدىكتى قاتاڭ باقىلايدى
كۇن تارتىبىندەگى باستى ماسەلە - «قورعاس» حالىقارالىق شەكارا ماڭى ىنتىماقتاستىق ورتالىعىنداعى قوعامدىق قاۋىپسىزدىكتى قامتاماسىز ەتۋ. باسقوسۋ قورىتىندىسى بويىنشا تاراپتار ءوزارا ىنتىماقتاستىق جونىندەگى مەموراندۋمعا قول قويدى.
ايتا كەتەرلىگى، سوڭعى رەت وڭىرلەردىڭ قىزمەتكەرلەرى «قورعاس» حالىقارالىق شەكارا ماڭى ىنتىماقتاستىق ورتالىعى سالىنىپ جاتقاندا باس قوسقان بولاتىن. تاراپتاردىڭ ءوزارا ىنتىماقتاستىعى جانە قىلمىسپەن كۇرەس ماسەلەسى دە سول ۋاقىتتان بەرى شەشىمىن تاۋىپ كەلەدى. ەندىگىسى - كوشى- قون ماسەلەسىن رەتتەۋ، قوعامدىق قاۋىپسىزدىكتى قامتاماسىز ەتۋ. بۇل رەتتە، الماتى وبلىسىنىڭ ىشكى ىستەر دەپارتامەنتى بيىل قورعاستا وزدەرىنىڭ وكىلدىكتەرىن اشتى. بۇل كۇنى قىتايلىقتار دا وسى باعىت بويىنشا جۇمىس اتقارۋدا.
ق ح ر ىلە- قازاق اۆتونوميالىق ايماعى مەن ش ۇ ا و قوعامدىق قاۋىپسىزدىك باسقارماسىنىڭ باسشىسى گاو چيدىڭ ايتۋىنشا، جىبەك جولىنىڭ بويىندا ورنالاسقاندىقتان حالىقارالىق ىنتىماقتاستىقتىڭ قاۋىپسىزدىگىن قامتاماسىز ەتۋ ماڭىزدى.
«سەبەبى، «قورعاس» حالىقارالىق شەكارا ماڭى ىنتىماقتاستىق ورتالىعىنا جاقىندا بۇكىل الەمنەن ادامدار كەلە باستايدى. سوندىقتان ءبىز ەكى ەلگە دە ماڭىزدى جوبا ءۇشىن قولىمىزدان كەلگەننىڭ بارلىعىن جاساۋىمىز كەرەك. قىتاي مەن قازاقستاننىڭ ءتارتىپ ساقشىلارىنىڭ ىنتىماقتاستىعىنىڭ ناتيجەسىندە حالىقارالىق قىلمىس ماسەلەسى بويىنشا جاقسى كورسەتكىشتەرگە قول جەتكىزەمىز دەپ سەنەمىن»، - دەدى ول.
قول قويىلعان جوبالىق كەلىسىمنىڭ ءاربىر باعىتى ەگجەي- تەگجەيلى تالقىلاندى. ەكى كۇندىك جۇمىستىڭ ناتيجەسىندە ەكى تاراپ كەلىسىمگە كەلىپ، ىرگەلەس جاتقان ەكى مەملەكەتتىڭ پوليتسيالارى ىنتىماقتاستىق جونىندەگى مەموراندۋمعا قول قويدى.
ال الماتى وبلىستىق ءى ءى د باستىعى مۇرات ۇرۇمحانوۆتىڭ ايتۋىنشا، قول قويىلعان قۇجاتتىڭ قاۋىپسىزدىك باعىتىنداعى ماڭىزى زور.
«بۇگىن ەكى كۇن بويى قىتايلىق ارىپتەستەرىمىزبەن تانىسىپ، تالقىلاپ، پىكىر الماسقان قۇجاتقا قول قويىلدى. مۇندا ەكى تاراپتىڭ ءوزارا ىنتىماقتاستىق، ءبىر- بىرىمىزگە قولدانىستاعى زاڭ اياسىندا ءوزارا زاڭگەرلىك كومەك كورسەتۋ بويىنشا ماسەلەلەردى ناقتى جۇيەگە قويدىق. بۇل ىنتىماقتاستىق ەكى ەلگە دە ماڭىزدى جوبا اياسىندا تابىستى جۇمىس ىستەۋگە جول اشادى»، - دەدى م. ۇرۇمحانوۆ.
كەزدەسۋدىڭ سوڭىندا ەكى ەلدىڭ ءتارتىپ ساقشىلارى قىلمىسقا قارسى بىرلەسىپ كۇرەسىپ، ەكى ەلدىڭ قاۋىپسىزدىگىن قامتاماسىز ەتۋگە ۋاعدالاسىپ، تارقاستى. ەندى جاڭا قۇجات بويىنشا قىزۋ جۇمىسقا كىرىسپەك.
