قازاقستاندا مۇناي ءوندىرۋ كولەمى ارتادى
بۇل تۋرالى بۇگىن ق ر پارلامەنتى ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ ۇلتتىق قورىنان 2016-2018 -جىلدارعا ارنالعان كەپىلدەندىرىلگەن ترانسفەرت تۋرالى» ق ر زاڭىنا وزگەرىس ەنگىزۋ تۋرالى» ق ر زاڭىنىڭ جوباسىن تانىستىرعان ق ر ۇلتتىق ەكونوميكا ءمينيسترى قۋاندىق بيشىمبايەۆ ءمالىم ەتتى.
ءمينيستردىڭ ايتۋىنشا، زاڭ جوباسى 2016 -جىلى ۇلتىق قوردان كەپىلدەندىرىلگەن ترانسفەرت كولەمىن 2880 ميلليارد تەڭگەدەن 2479,7 ميلليارد تەڭگەگە دەيىن قىسقارتۋ قاراستىرىلادى. بۇل وسى جىلى رەسپۋبليكالىق بيۋدجەتىنىڭ ارتىق ورىندالۋىنىڭ كۇتىلۋىنە بايلانىستى جايت.
«ناقتى ايتار بولساق، بۇل 2016 -جىلدىڭ باسىنداعى بولجامعا قاراعان سالالار ديناميكاسىنىڭ جاقسارۋى ەسەبىنەن 413 ميلليارد تەڭگەنىڭ تۇسۋىنە بايلانىستى. مۇنان بولەك، ءبىز زور سەنىممەن مۇنايدىڭ ورتاشا باعاسى بولجام دەڭگەيىنەن جوعارى بولاتىندىعىن كورىپ وتىرمىز. ەستەرىڭىزدە بولسا، ول 30 دوللار دەڭگەيىندە قالىپتاسقان ەدى. ال وتكەن 8,5 ايدىڭ ىشىندە ورتاشا جىلدىق 40,5 دوللار دەڭگەيىندە قالىپتاستى. باعانىڭ ءاربىر 5 دوللارعا ارتۋى بىزگە ەكسپورتتىق كەدەن سالىعى تۇرىندەگى قوسىمشا ءتۇسىم اكەلەدى»، - دەدى ول.
ونىڭ ايتۋىنشا، ەكسپورتتىق كەدەن سالىعى بويىنشا تۇسىمدەر 178 ميلليارد تەڭگە مولشەرىندە بولجانۋدا. سونىمەن قاتار مۇناي ءوندىرۋ كولەمى دە بولجامدى 74 ميلليون توننادان 75,5 ميلليون تونناعا دەيىن ارتپاق. ونىڭ ىشىندە قاشاعاننان وندىرىلەتىندىگى كۇتىلىپ وتىرعان 500 مىڭ توننا مۇناي دا بار.
ق. بيشىمبايەۆتىڭ ءمالىم ەتۋىنشە، كەلەسى جىلى كەپىلدەندىرىلگەن ترانسفەرت جارتىلاي تومەندەتىلەدى جانە 2017 -جىلدىڭ سوڭىندا ۇلتتىق قوردىڭ قورى شامامەن 57 ميلليارد تەڭگەنى قۇرايتىن بولادى.
اۆتور: مارلان جيەمباي
