ۇزىناعاشتا قازا تاپقان ءۇش اعايىندىنىڭ تۋىستارى قىلمىستى ەكى ادام جاسادى دەگەنگە سەنبەيدى
ال، مارقۇم جارقىنبەك دولدان ۇلىنىڭ تۇڭعىشى 13 جاستاعى جالىن قىلمىسكەرلەرگە ءولىم جازاسى بەرىلسە دەيدى. بۇل تۋرالى قازاقپارات تىلشىسىنە مارقۇم مۇقيات زارىلحاننىڭ تۋعان اعاسى ادال زارىلحان ايتىپ بەردى.
ونىڭ ايتۋىنشا، قازا بولعان تۋىستارى وڭايشىلىقپەن دەس بەرمەيتىن، قارۋلى ازاماتتار بولعان. «ولار وزدەرىنىڭ قولدارىن وزدەرى بايلاپ بەرمەسە، قالايشا ەكى ادامنىڭ كۇشى ءۇش ادامعا جەتەدى. تىپتەن ميعا سىيمايتىن دۇنيە» ، - دەيدى كوزىنە جاس الا وتىرىپ ادال زارىلحان.
ادال ءوزىنىڭ تۋعان باۋىرى مۇقيات مارقۇمنىڭ مۇلدەم ىشىمدىككە جوق، سپورتپەن ۇنەمى شىنىعىپ جۇرەتىن، بالا كۇنىنەن كۇرەسپەن اينالىسقانىن، وسى سپورت تۇرىنەن بىرنەشە رەت جەڭىمپاز دا اتانعانىن ايتىپ وتىر. بويى اسا جوعارى بولماسا دا، دەنەسى شىمىر ەدى دەيدى.
«جالپى جارقىنبەك پەن قادىلبەككە باس كوز بولىپ، بيزنەستىڭ باسى قاسىندا ءجۇرىپ، ساۋدالاساتىن دا وسى مۇقيات بولاتىن. مۇقيات 1973 -جىلعى، ال، جارقىنبەك دولدان 1979 -جىلعى، قادىلبەك ءالىمحان 1977 -جىلى تۋعان. قادىلبەك ءالىمحان الىپ جىگىت بولاتىن. سالماعىنىڭ ءوزى 100 دەن اساتىن. سوڭعى رەت قۇربان ايتتا «سالماعىم 110 عا جاقىنداپ قالدى» ، - دەگەن قادىلبەكتىڭ قالجىڭى دا ەسىمدە» ، - دەيدى اعاسى ادال.
قازىر قازا بولعان 3 اعايىندى مارقۇمنىڭ ارتىندا 8 بالاسى جەتىم، ايەلدەرى جەسىر قالدى. بالالاردىڭ ەڭ ۇلكەنىنىڭ جاسى 13 تە، ال كىشىسى 2 دە عانا. اكەلەرىن بۇگىن جەر قوينىنا تاپسىرعان جارقىنبەك دولدان ۇلىنىڭ تۇڭعىشى 13 جاستاعى جالىن قىلمىسكەرلەرگە ەڭ اۋىر جازا، اتۋ جازاسى بۇيىرسا دەپ تىلەيدى. تۋىستارىنىڭ سوزىنشە، جالىن اكەسى جارقىنبەك جوعالعان ساتتەن باستاپ، بىردەن ەسەيە تۇسكەن. قارىنداستارى ءدىلنار مەن ىڭكارعا ءوزى باسكوز بولىپ ءجۇر.
ايتا كەتۋ كەرەك، الماتى وبلىسىندا جۋىردا مال ساتۋعا كەلگەن اعايىندى 3 ازامات ءىزىم- قايىم جوعالىپ، ارتىنشا ولاردىڭ ءولى دەنەلەرى تابىلعان ەدى. قازىر 3 ازاماتتى ءولتىردى دەگەن كۇدىكپەن 2 ادام ۇستالدى. الايدا، مارقۇمنىڭ تۋىستارى قىلمىسكەرلەر ءالى دە بوستاندىقتا ءجۇر دەپ كۇدىكتەنەدى. سول سەبەپتى اتالعان ءىس ءادىل جۇرسە دەپ تىلەدى.
ەستەرىڭىزگە سالا كەتەيىك، بۇگىن ق ر پرەمەر- ءمينيسترى باقىتجان ساعىنتايەۆ ۇكىمەتتىڭ وتىرىسىندا ق ر ىشكى ىستەر ءمينيسترى قالمۇحامبەت قاسىموۆقا تەرگەۋ بارىسىن جەكە باقىلاۋعا الۋدى تاپسىرىپ: «قوعامدىق قاۋىپسىزدىك جانە قىلمىسپەن كۇرەس بۇل ماڭىزدى مىندەت. ءبىز مۇنى ۇكىمەتتىڭ جەكە وتىرىسىندا قارايمىز» ، - دەپ اتاپ ءوتتى.
سامال قابىشيەۆا
