قازاقستاندا تۇڭعىش رەت جىلقىلاردىڭ شوۋ باعدارلاماسى وتپەك - فوتو
اتالعان مەرەكەلىك باعدارلاما الدىندا ۇيىمداستىرۋشىلار اسىل تۇقىمدى جىلقىلاردى تاماشالاۋ ءۇشىن تاۋ بوكتەرىندە ب ا ق وكىلدەرىنىڭ باسىن قوستى.
اتقۇمار جاندار ءۇشىن ۇيىمداستىرىلىپ وتىرعان وتباسىلىق مەرەكەدە تەاترلاندىرىلعان كورىنىس، قالپىنا كەلتىرىلگەن تاريحي جادىگەرلەر، الماتىلىق سۋرەتشىلەردىڭ تاقىرىپتىق تۋىندىلارى قويىلماق. سونداي- اق، بالالارعا ارنالعان ارنايى باعدارلامالار بولادى.
شارانى الما- اراسان سايىندا ورنالاسقان «Chamberlain» جىلقى كلۋبىنىڭ مەنشىكتى يەسى «KazEqui - 2016» ۇيىمى ۇيىمداستىرىپ وتىر.
«Chamberlain» كلۋبىنىڭ جەتەكشىسى مارينا بۋكانوۆا جىلقى شوۋىنىڭ ماقساتى قازاقستاندىقتارعا ات باپتاۋدىڭ سوڭعى جەتىستىكتەرى - جىلقىمەن قارىم- قاتىناستىڭ جاڭا ۇلگىسىن تانىتۋ ەكەنىن ايتتى.
«ءبىزدىڭ كلۋب 2011 -جىلى قۇرىلدى. كلۋبتىڭ اتقوراسىندا 50 جىلقى بار. ءبىزدىڭ كلۋبتىڭ وزگە جىلقى كلۋبتارىنان ايىرماشىلىعى مۇندا اتتارعا ەرەكشە كۇتىم جاسالادى. سونداي-اق، ايىنا 100 گە جۋىق بالانى اتقا مىنگىزىپ ۇيرەتەمىز. بۇل ارادا يپپوتەراپيا (كونە گرەك ءسوزى - «hippos» - جىلقى، جىلقىمەن ەمدەۋ - اۆتور) تۋرالى ايتا كەتكەن ورىندى بولار. داۋن، 1-2 دەڭگەيدەگى ومىرتقانىڭ قيسايۋى، اۋتيزم سەكىلدى دەرتكە شالدىققان بالالاردى جىلقىعا مىنگىزىپ ەمدەيمىز»، - دەيدى مارينا بۋكانوۆا.
سونىمەن قاتار، ول جىلقىعا ءمىنۋدى ۇيرەتەتىن جاتتىعۋ ساباقتارى ءوتىپ تۇراتىنىن ايتتى.
كلۋب ۆەتەرينارى، ات باپتاۋشى، سەيىس ماريا سىتنيكوۆانىڭ كلۋب قوراسىنداعى اسىل تۇقىمدى جىلقىلارمەن جۋرناليستەردى تانىستىردى.
«ەرتەڭگى شوۋدا ءبىز اسىل تۇقىمدى جىلقىلاردى كورسەتپەكپىز. بىزدە، رايد- پونيدەن باستاپ، اراب، احالتەكە، اعىلشىن، قازاق- اعىلشىن تۇقىمدارى بار. جىلقىلاردىڭ دەنى ەۋروپادان اكەلىنگەن»، - دەدى ماريا سىتنيكوۆا.
ۇيىمداستىرۋشىلار الداعى وتەتىن شارا اۋقىمدىلىعىمەن عانا ەمەس، ءتۇرلى اسىل تۇقىمدى جىلقىلاردى تانىستىرۋمەن ەستە قالماق دەپ سەندىرىپ وتىر.
