كوكشەتاۋلىق حاتشىباي - ۇلتتىق بۇيىمدار شەبەرى
وسى ورايدا، بۇلاندى اۋدانىنداعى ەڭبەكپەن قامتۋ ورتالىعى باعدارلامانى جۇزەگە اسىرۋعا تىكەلەي اتسالىسىپ وتىر. باعدارلامانىڭ ءبىر ارتىقشىلىعى جەكە ءىسىن اۋىلدا ۇيىمداستىرۋدى قالايتىندارعا باسىمدىق بەرىلگەنى تاعى بار. «جۇمىسپەن قامتۋدىڭ جول كارتاسى - 2020» باعدارلاماسىنا بەلسەنە اتسالىسىپ، باسىمدىققا يە بولعانداردىڭ بىرەگەيى نيكولسك اۋىلىنىڭ تۇرعىندارى ەدى. سولاردىڭ ءبىرى - موڭعوليادان تاريحي وتانىنا ورالعان بەكەي حاتشىباي دەگەن ازامات. ول اتامەكەنىنە كەلگەلى قول قۋسىرىپ وتىرماي، ءوز كاسىبىمەن اينالىستى. نيكولسك اۋىلىندا شەبەرحانا اشىپ، ۇلتتىق ناقىشتاعى قولونەر بۇيىمدارىن جاساۋدا. قازىر ونىڭ قولىنان شىققان بۇيىمدار تۇرعىندار اراسىندا ۇلكەن سۇرانىسقا يە بولۋدا.
«ۇلتتىق كيىمدەر تىگۋگە تاپسىرىس كوبەيدى. وسى ورايدا، «جۇمىسپەن قامتۋدىڭ جول كارتاسى - 2020» باعدارلاماسىنىڭ بەرەرى مول دەر ەدىم. وسى باعدارلامانىڭ ارقاسىندا ءوز ءىسىمدى اشىپ، كاسىبىمدى دوڭگەلەتۋدەمىن. قازىرگى كەزدە، سۇيىكتى ىسىممەن اينالىسىپ وتىرعانىما قۋانىشتىم. ەل تاۋەلسىزدىگىنىڭ 25 جىلدىعىن تابىستى قارسى العانىمىزعا شۇكىرشىلىك ەتەمىن»، - دەيدى جەكە كاسىپكەر بەكەي حاتشىباي.
قازاقتا «نيەت قويعان ادامعا جەكە كاسىپپەن اينالىسۋعا ەشقانداي كەدەرگى جوق» دەگەن اتالى ءسوز بار. بۇعان بەكەي حاتشىبايدىڭ كاسىبى ايقىن دالەل. شەبەرحانا سىرتىنان قاراعاندا جۇپىنى جەكەمەنشىك ۇيلەردىڭ ءبىرى، ال ىشىنە ەنگەندە، جاڭا تىگىلگەن ۇلتتىق كيىم- كەشەك پەن توسەنىشتىڭ بىرنەشەۋى بىردەن كوزدىڭ جاۋىن الادى. مۇندا تىگىن ماشينالارى زىرىلداپ، توقتاۋسىز جۇمىس ىستەۋدە. شاعىن بولمەدە قاز- قاتار ءتىزىلىپ قويىلعان اياق- كيىمدەر مەن ءىلۋلى تۇرعان ۇلتتىق كيىمدەر، ادەمىلەپ جينالعان ءتۇرلى توسەك ورىندار وسىنداعى ءوندىرىستىڭ ءبىرشاما قۋاتتىلىعىن اڭعارتقانداي. وتپەي جاتقان ونىمدەر دەيتىندەي ەمەس، دايىن ءونىمدى ساتىپ الىپ جاتقانداردى دا كەزدەستىردىك. ولار اسىرەسە، قىز ۇزاتۋ، كەلىن ءتۇسىرۋ سياقتى ۇلتتىق ناقىشتا وتەتىن توي- تومالاقتاردا ءجيى پايدالانىلاتىندىقتان، تۇرعىندار تاراپىنان سۇرانىس مول.
سۋرەتتە: تىگىنشى ءباتيما ءادي كەستەلى كورپەلەر تىگىپ، شەبەرحانا ونىمدەرىنىڭ ءتۇرىن كوبەيتۋدە. ول بۇعان دەيىن جۇمىسسىز جۇرگەندەردىڭ ءبىرى ەدى. بالا كەزىنەن ۇيرەنگەن ءىسى بۇگىن قاراجات تابۋعا سەپتىگىن تيگىزۋدە.
اۋىل تۇرعىندارى اراسىندا حاتشىباي تىككەن اياق كيىمدەر، كويلەكتەر جوعارى سۇرانىسقا يە.
گۇلدەن بەكەي كەرگىشكە تارتىلعان ماتاعا كەستەلەپ ويۋ سالعاندا قيمىلىنا كوز ىلەسپەيدى. ونىڭ قولىنان شىققان بۇيىمدار قازاقي داستۇرمەن ۇزاتىلعان قىزداردىڭ جاساۋىنا قولدانىلۋدا.
شەبەر تىگىنشىلەردىڭ ءبىرى مانۋارا اسقار. بۇل شەبەرلەردىڭ قولىنان شىققان ۇلتتىق ناقىشتاعى كورپەلەر، جاستىقتار، كويلەكتەر استانا قالاسىندا دا سۇرانىسقا يە.
قازىر شەبەرحانادا حاتشىبايمەن بىرگە ەكىنشى ەتىكشى - قۋانىش نيازبەك جۇمىس ىستەۋدە.
حاتشىباي بەكەي بۇگىنگى كۇنى «جۇمىسپەن قامتۋدىڭ جول كارتاسى - 2020» باعدارلاماسى ارقىلى ءوز ءىسىن ءساتتى باستاپ، تابىسقا كەنەلىپ وتىرعان قانداستاردىڭ ءبىرى.
اۆتور: اسلان وسپانوۆ
