جەكە كولىك يەلەرى قيىندىققا تاپ بولۋى مۇمكىن - يسەكەشيەۆ
بۇل تۋرالى بۇگىن ەلوردادا «استانا قالاسىنىڭ كولىك كەشەنىنىڭ دامۋ ءۇردىسى» اتتى كونفەرەنسيادا قالا اكىمى اسەت يسەكەشيەۆ ءمالىم ەتتى.
«ءبىز استانانى ءومىر سۇرۋگە بارىنشا ىڭعايلى قالاعا اينالدىرۋعا نيەتتىمىز. ول ءۇشىن قالالىق ينفراقۇرىلىمدى وزگەرتۋ، تۇرعىن ءۇي- كوممۋنالدىق شارۋاشىلىق سالاسى مەن قىزمەت كورسەتۋ باعىتتارىن جاقسارتۋ، جاڭا تەحنولوگيالاردى ەنگىزۋ مەن «سمارت سيتي» قالىپتاستىرۋ قاجەت. جول- كولىك كەشەنىن دامىتۋ اياسىندا ساپالى جولدار، كوپىرلەر مەن ينفراقۇرىلىمنىڭ باسقا دا ەلەمەنتتەرىن سالۋ قاراستىرىلعان. قازىرگى كەزدە ارنايى باعدارلاما ازىرلەندى»، - دەدى قالا اكىمى.
استانا حالقىنىڭ تۇرعىندارى 1 ميلليوننان اسىپ كەتكەنىنە توقتالعان ءا. يسەكەشيەۆ، بۇگىندە شاھاردا كولىك سانى ارتقانىن، وسى ورايدا قالاعا وزگە وڭىرلەردەن كەلگەن ترانزيتتىك اۆتوموبيلدەردى قوسا ەسەپتەگەندە 500 مىڭعا جەتەتىنىن جەتكىزدى. قالاداعى كولىكتىك جۇيە 952 كوشەدەن تۇرادى، ال جولداردىڭ جالپى ۇزاقتىعى 950 شاقىرىمنان اسادى.
«حالىقتىڭ اۆتوموبيلگە وتىرۋى قارقىنى تۇرعىندار سانىنىڭ جىلدىق دەڭگەيدە ارتۋى كولەمىنەن ەكى ەسە ارتىپ وتىر. بۇل ءوز كەزەگىندە ينفراقۇرلىمعا ەلەۋلى تۇردە جۇك ءتۇسىرىپ وتىر جانە كولىك كەپتەلىستەرى ورىن الۋدا»، - دەدى اكىم.
وسى رەتتە ول جول جەلىسىن دامىتۋ مەن قايتا جاڭعىرتۋ جۇمىستارى اياسىندا باسىمدىق جاياۋ جۇرگىنشىلەرگە، ۆەلوسيپەدشىلەرگە جانە قوعامدىق كولىكتەرگە بەرىلەتىنىن، تەك سودان كەيىنگى ورىندا اۆتوكولىكتەر بولاتىنىن قاداپ ايتتى.
«بۇل قادامدار الەمدىك ترەندتەرگە سايكەس كەلەدى. ارينە، بۇل شارالار اۆتوموبيلمەن جۇرەتىن قالالىقتاردىڭ نارازىلىعىن تۋدىراتىنى بەلگىلى، الايدا كولىكتىك كەشەن قوعامدىق يگىلىك رەتىندە جوعارىدا اتالعان باسىمدىقتاردى ەسكەرۋى ءتيىس»، - دەدى ءا. يسەكەشيەۆ.
