09:09, 26 - قىركۇيەك 2016 | GMT +5
ۇشاقتا سەمىز اداممەن بىرگە وتىرعان يتاليا ازاماتى اۋە كومپانياسىن سوتقا بەردى
استانا. قازاقپارات - Emirates اۋە كومپانياسىنا يتاليا ازاماتىنان شاعىم ءتۇستى. ول كەيپتاۋننان دۋبايعا دەيىنگى 9 ساعاتتىق ساپارى بارىسىندا سالماعى شەكتەن تىس كوپ ازاماتتىڭ جانىندا وتىرىپ بارعانىنا نارازى.
بۇل تۋرالى Arabian Business حابارلادى.
يتاليا ازاماتىنىڭ سوزىنشە، سالماعى شەكتەن تىس اۋىر ازامات ونىڭ ورنىنىڭ باسىم بولىگىن الىپ وتىرعان. وسىدان سوڭ يتاليا ازاماتى Emirates وكىلدەرىنەن وزگە ورىنعا اۋىسۋعا رۇقسات بەرۋدى سۇراعان. الايدا، ۇشاق قىزمەتكەرلەرى وندا وزگە بوس ورىن جوق ەكەندىگىن ايتىپ، يتاليالىقتىڭ ورنىن اۋىستىرۋىنا رۇقسات بەرمەگەن جانە ول ءۇشىن جولاۋشىدان كەشىرىم دە سۇراماعان، دەپ جازادى روسبالت. ال جولاۋشى 9 ساعات بويى ادامدار جۇرەتىن جولدا تۇرۋعا ءماجبۇر بولعان.
ەندى يتاليا ازاماتى ۇشاقتا وتكىزگەن ۋاقىتقا كەتكەن شىعىندى قوسا ەسەپتەگەن 3 مىڭ دوللار وتەماقى تولەۋدى تالاپ ەتىپ وتىر.
