08:46, 26 - قىركۇيەك 2016 | GMT +5
بەردىبەك ساپاربايەۆ جالپى رەجيمدەگى كولونيادا بولدى
استانا. قازاقپارات- اقتوبە وبلىسىنىڭ اكىمى بەردىبەك ساپاربايەۆ العاش رەت ك ا-168/2 مەكەمەسىندە بولدى. بۇل تۋرالى اقتوبە وبلىستىق قىلمىستىق- اتقارۋ جۇيەسى دەپارتامەنتىنىڭ وكلدەرى حابارلادى.
«اتالمىش ساپاردىڭ باستى ماقساتى - اقتوبە وبلىستىق قىلمىستىق- اتقارۋ جۇيەسىن دامىتۋ ماقساتىندا مۇمكىندىكتەرمەن تانىسۋ بولدى. وسىعان بايلانىستى وبلىس باسشىسى مەكەمەدەگى ونەركاسىپ نىساندارى مەن كوپسالالى كوللەدج بەن كەشكى ورتا مەكتەپتىڭ جۇمىسىمەن تانىستى. سونىمەن قاتار اكىم تەگىن كاسىبي ءبىلىم بەرۋ مەن سوتتالعاندارعا جالپى ءبىلىم بەرۋ ۇدەرىسىن كوردى»، - دەپ حابارلادى وبلىستىق قىلمىستىق- اتقارۋ جۇيەسىنىڭ باستىعى ەرنات اقىلجانوۆ.
وبلىس باسشىسىن مەكەمە جۇمىسىمەن تانىستىرۋ بارىسىندا اقىلجانوۆ جەرگىلىكتى بيزنەس قۇرىلىمداردى تارتا وتىرىپ، سوتتالعاندار ءۇشىن جۇمىس ورىندارىن اشۋ، سونىمەن قاتار ولاردى بوستاندىققا شىققان سوڭ جۇمىسپەن قامتۋ سياقتى ماسەلەلەرگە نازار اۋداردى.
