قازاقستاندا مەملەكەتتىك شەكارانى مەكتەپ وقۋشىلارى دا كۇزەتە باستادى
«حابار-24» تەلەارناسىنىڭ حابارلاۋىنشا، سارى اعاش اۋدانىندا شەكاراشىلاردىڭ جاس دوستارى قوزعالىسى قايتا جاندانعان. قازىرگى تاڭدا ۇيىرمەلەر مەكتەپ جانىنان قۇرىلىپ، وندا وقۋشىلاردى اسكەري قىزمەتكە باۋلۋدا. حالىق بەلسەندىلەرىنە ءتىپتى ارنايى كۋالىكتەر دە بەرىلگەن.
جاسوسپىرىمدەر بولسا، شەكارا زاڭدارىن بۇزۋشىنى ۇستاۋعا قولعابىس ەتۋدە. بىردە شەكارا ماڭىندا كۇدىكتى ادامدى كورگەن وقۋشىلار بۇل اقپاراتتى ەرەسەك ازاماتتارعا جەتكىزگەن. ناتيجەسىندە اۋىر قىلمىس جاساعانى ءۇشىن ينتەرپول ىزدەپ جۇرگەن قىلمىسكەر قولعا ءتۇستى.
تاعى ءبىر وقيعا قاپلانبەك اۋىلىندا بولدى. مەكتەپ وقۋشىسى بەلگىسىز ازاماتتىڭ زاڭسىز شەكارا اسقالى جۇرگەنىن بايقاپ قالاپ، دەرەۋ قاجەتتى جەرگە حابار بەرگەن. بۇل زاڭ بۇزۋشى دا ۇستالدى.
«بۇگىن ءبىز جاسوسپىرىم شەكاراشىلارعا كۋالىكتەرىن بەردىك. بۇل - وسكەلەڭ ۇرپاقتى تاربيەلەۋ. ءبىزدىڭ جاۋىنگەرلەرىمىز ارينە، قاشاندا ساق. الايدا، بىزگە بالالاردىڭ دا كومەكتەسۋگە دايىن ەكەندىكتەرىن كورىپ وتىرمىز. ەندەشە ولاردىڭ نيەتتەرىن نەگە قابىل الماسقا. ءبىز ولارمەن بىرگە وتە كوپ پاتريوتتىق شارالار ۇيىمداستىرامىز»، - دەدى شەكارا كومەنداتۋراسى كومەندانتىنىڭ ورىنباسارى عالىمجان ابەنوۆ.
