جاپوندىقتار شەتەلدىكتەرگە ارناپ، قاۋىپتەردى ەسكەرتۋ جۇيەسىن جاساماق

استانا. قازاقپارات - جاپونيا بيلىگى شەتەلدىكتەرگە ارناپ، بولۋى ىقتيمال ءتۇرلى قاۋىپ- قاتەرلەر تۋرالى ارنايى اقپارات بەرەتىن جۇيەنىڭ جۇمىسىن جولعا قويماق.

 بۇل تۋرالى جەكسەنبى كۇنى NHK تەلارناسى حابارلادى.

بۇل جۇيە وسىعان دەيىنگى J- Alert جۇيەسىنە ۇقساس L- Alert دەپ اتالاتىن بولادى. ءتيىستى قاۋىپ- قاتەرلەر تۋرالى مالىمەتتەر تەلەۆيزيا، راديو جانە ۇيالى بايلانىس قۇرالدارى ارقىلى تاراتىلادى.

مىسالى، شەتەلدىك تۋريستەر قاۋىپ تۋىنداعان جاعدايدا جاقىن ماڭدا ورنالاسقان جەرتولەلەر مەن ازاماتتاردى قاۋىپسىز ايماققا كوشىرىلۋى تۋرالى اقپاراتتاردى الدىن الا بىلە الاتىن بولادى، دەپ حابارلايدى ت ا س س.

بۇل مىندەتكە جاپوندىقتار 2020 -جىلى توكيودا وتەتىن وليمپيادا قارساڭىندا ەرەكشە كوڭىل ءبولىپ وتىر. سونىمەن قاتار قازىر ۇيالى بايلانىستار ءۇشىن ارنايى موبيلدى قىزمەت ءتۇرى شىعارىلاتىندىعى ايتىلۋدا. الايدا، بيلىك وكىلدەرى شەتەلدىك قوناقتاردىڭ قولىندا ۇيالى بايلانىس قۇرالدارى بولماي قالعان جاعدايدا پايداسى تيەدى دەگەن ويمەن ىقتيمال قاۋىپ- قاتەرلەر تۋرالى جاپپاي جاريالاۋ ءادىسىن دە قولدانۋ جاعىن قاراستىرۋدا.

جاپونيا سەيسميكالىق جاعىنان بەلسەندى ايماقتا ورنالاسقان. سول سەبەپتى بۇل ەل تابيعي اپاتتارعا بەيىم. جەر بەتىندەگى ءزىلزالالاردىڭ باسىم بولىگى وسى جاپون ەلىندە بولىپ تۇرادى. سونىمەن بىرگە مۇندا جاز، كوكتەم مەزگىلدەرىندە تايفۋندار مەن داۋىلدار ءجيى سوعادى.