جەمقورلىقپەن كۇرەسۋ ءۇشىن مەملەكەتتىك فۋنكسيالاردىڭ ءبىرقاتارى جەكە سەكتورعا بەرىلمەك

وسكەمەن. قازاقپارات - سالالىق زاڭداردىڭ جەتىلمەنگەندىگى، مەملەكەتتىك جانە كورپوراتيۆتىك باسقارۋ اشىقتىعىنىڭ جەتكىلىكسىز بولۋى، شەنەۋنىكتىڭ ازاماتپەن بەتپە- بەت كەزدەسۋى، حالىقتىڭ، سونىڭ ىشىندە مەملەكەتتىك سەكتوردىڭ قۇقىقتىق مادەنيەتىنىڭ تومەن دەڭگەيى جەمقورلىققا الىپ كەلەدى.

بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە مەملەكەتتىك قىزمەت ىستەرى مينيسترلىگى شقو بويىنشا دەپارتامەنتىنىڭ باسشىسى توقتامىس جۇماعۇلوۆ ايتتى.

«بۇل رەتتە، ءبىرقاتار مەملەكەتتىك فۋنكتسيالاردى مەملەكەتتىك ەمەس سەكتورعا - ءوزىن- ءوزى رەتتەيتىن مەكەمەلەرگە كەزەڭ- كەزەڭىمەن بەرۋ جۇمىستارى قولعا الىناتىن بولادى»، - دەدى ول.

 ولاردىڭ العاشقىسى ادامي فاكتوردىڭ ىقپالىن بارىنشا ازايتۋ جانە زاماناۋي اقپاراتتىق تەحنولوگيالاردى كەڭىنەن پايدالانۋ بولادى. ناتيجەسىندە حالىققا ەلەكتروندى فورماتتا كورسەتىلەتىن قىزمەتتەر ءتۇرى ارتادى.

 ونىڭ ايتۋىنشا، مەملەكەت پەن قوعامنىڭ تىعىز قارىم- قاتىناسى عانا سىبايلاس جەمقورلىققا قارسى تۇرا الادى. ەسكە سالساق، قازاقستاندا 2015-2025 -جىلدارعا ارنالعان جەمقورلىققا قارسى ستراتەگيا ازىرلەنىپ، جۇزەگە اسىرىلۋدا.