مايىتتەر ساراپتامادا، جانازالارى تۋرالى ەشتەڭە ايتا المايمىز - قازا بولعان اعايىندىلاردىڭ تۋىستارى

الماتى. قازاقپارات - باۋىرلارىمىزدىڭ مايتتەرىن ءالى العانىمىز جوق، دەيدى الماتى وبلىسى ۇزىناعاش اۋىلىندا مال ساتىپ، كەيىن ءىز- ءتۇزسىز جوعالىپ كەتكەن جىگىتتەردىڭ تۋىسقانى تۇرسىن ءالىمحان كەشە كەشتە  «قازاقپارات» تىلشىسىنە بەرگەن جاۋابىندا.

«مايىتتەردى ساراپتاماعا الىپ كەتكەن. ءالى بەرگەن جوق. جانازالارى تۋرالى ەشتەڭە ايتا المايمىز. ۇستالعانداردىڭ اتى- ءجونىن بىزگە ءالى ايتقان جوق»، - دەدى زارلىحان ۇلى مۇقيات پەن ءالىمحان قادىلبەكتىڭ اعايىنى تۇرسىن ءالىمحان.

ەسكە سالا كەتەيىك، وتكەن جەكسەنبىدە ب ا ق- تا الماتى وبلىسى جامبىل اۋدانىندا مال ساۋداسىمەن اينالىسىپ جۇرگەن ءۇش جىگىتتىڭ جوعالىپ كەتكەنى تۋرالى حابارلانعان بولاتىن.

مارقۇمداردىڭ تۋىسقاندارىنىڭ ايتۋىنشا، دولدان ۇلى جارقىنبەك (1979 -جىلى تۋعان) ، زارلىحان ۇلى مۇقيات (1973 -جىلى تۋعان)، ءالىمحان قادىلبەك شىعىس قازاقستان وبلىسىنىڭ تارباعاتاي اۋدانىنان ساتىپ العان 40 باس مالدى ەكى جۇك كولىگىمەن 17 - قىركۇيەك كۇنى ۇزىناعاش بازارىنا شىعارعان. سودان كەيىن ولار ءىز- ءتۇزسىز جوعالىپ كەتكەن.

ەسكە سالايىق، بۇگىن الماتى وبلىستىق ىشكى ىستەر دەپارتامەنتىنىڭ باسپا ءسوز قىزمەتىنەن ءىز- ءتۇسسىز جوعالعان ءۇش اعايىندىنىڭ ولىمىنە كۇدىكتىلەر ۇستالعانى حابارلاندى.

«وبلىستىق ىشكى ىستەر دەپارتامەنتىنىڭ باسشىسىنىڭ ءبىرىنشى ورىنباسارى پودپولكوۆنيك نۇرلان ءماسىموۆ باسشىلىق ەتكەن ىزدەۋ شارالارىنا اۋداندىق جانە ايماقتىق پوليتسەيلەر دە جۇمىلدىرىلدى. جوعالعانداردى ءولتىردى دەگەن كۇدىكپەن جامبىل اۋدانىنىڭ ەكى ازاماتى ۇستالدى. جابىرلەنۋشىلەردىڭ دەنەلەرى تابىلدى. ق ر  ق ك 99-بابى، 2- ءبولىمى بويىنشا (كىسى ءولتىرۋ) قىلمىستىق ءىس قوزعالدى»، - دەلىنگەن باسپا ءسوز قىزمەتىنىڭ حابارىندا.

 كىسى ءولتىرۋ فاكتىسى بويىنشا تەرگەۋ جۇمىستارى الماتى وبلىستىق ىشكى ىستەر دەپارتامەنتى باسشىلىعىنىڭ قاتاڭ نازارىندا.