دەپۋتاتتىق كرەسلوعا اۋىسقان اكتەر اسىلحان تولەپوۆ حالىق ريزاشىلىعىنا بولەنۋدە

استانا. قازاقپارات - ينستاگرام الەۋمەتتىك جەلىسىن پايدالانۋشىلاردىڭ ءبىرى ءوزىنىڭ پاراقشاسىندا قازاقستاندىقتارعا «جاۋ جۇرەك مىڭ بالا» فيلمىندەگى رولىمەن تانىمال بولعان اكتەر، بۇگىندە جاس دەپۋتات اسىلحان تولەپوۆتىڭ جۇمىسىنا ريزاشىلىعىن ءبىلدىردى.

ونىڭ تولەپوۆكە ارنالعان ماقتاۋ جازباسى الماتى قالاسىنىڭ ناۋرىزباي اۋدانىندا اكتەرمەن كەزدەيسوق بولعان كەزدەسۋدەن كەيىن تۋىنداعان- مىس. جەلى پايدالانۋشىسى تولەپوۆتىڭ كىشىپەيىل ءارى قاراپايىم ەكەنىن جازا كەلە، ونىڭ دەپۋتات رەتىندە اتقارىپ ۇلگەرگەن ىزگى ىستەرىن تىزبەكتەگەن.

«اسىلحان - قازاقستانداعى ەڭ جاس دەپۋتات، بار- جوعى 24 جاستا. وعان قوسا، الماتى قالاسىنىڭ قۇرامىنا جاڭادان قوسىلعان 8-اۋدانداعى جالعىز دەپۋتات. جالعىز جانە العاشقى بولۋدىڭ جاۋاپكەرشىلىگى جوعارى. حالىق پەن بيلىكتىڭ اراسىندا «التىن كوپىر» بولۋ وڭاي ەمەس. سونداي- اق، اۋداندا كوبىنە قازاقتار ءومىر سۇرەدى. ال تەك قانا قازاقشا سۇحبات بەرەتىن ۇلتقا جاناشىر اسىلحانداي جىگىتتى ناۋرىزباي اۋدانىنا بەكەر جىبەرمەگەنىن وسىدان- اق بايقاۋعا بولادى»، - دەيدى جازبا اۆتورى nurlanjanai.

اۆتوردىڭ ايتۋىنشا، اكتەر ءماسليحات دەپۋتاتى كرەسلوسىنا وتىرعان از ۋاقىت ىشىندە ءبىراز شارۋا تىندىرىپ ۇلگەرگەن.

«بيىل ناۋرىزباي اۋدانىنا الماتى قالاسىنىڭ اۋداندارى ىشىندە ەڭ كوپ بيۋدجەت بولىنگەن ەكەن. سوندىقتان سالىنىپ جاتقان قۇرىلىس جۇمىستارى وتە كوپ، ونىڭ ىشىندە جاڭا مەكتەپتەر مەن اسفالتتار بار. اسىلحان تولەپوۆ ءماسليحات دەپۋتاتى رەتىندە ولاردىڭ باسى- قاسىندا جۇرەدى. سونداي- اق، اۋدانداعى ساناۋلى سوعىس ارداگەرلەرى مەن قۇرمەتتى قاريالاردىڭ ءار مەيرام سايىن جاعدايىن سۇراپ، مۇمكىندىگىنشە اربالار، ازىق- تۇلىك سياقتى قاجەتتى زاتتارىن الىپ بەرۋگە كومەكتەسەدى»، - دەيدى ول.

 تولەپوۆ ءوز اتىنا ايتىلعان ماقتاۋعا ريزا بولعانى ما، nurlanjanai-دىڭ جازباسىمەن ءوز پاراقشاسىندا بولىسكەن. بۇدان ءارى ماقتاۋلار لەگى ينستاگرامنىڭ وزگە پايدالانۋشىلارى تاراپىنان تۇسە باستاعان. ءبىر بايقاعانىمىز، ولاردىڭ اراسىندا بىردە- ءبىر جاعىمسىز پىكىر جوق.

گۇلميرا الياكپاروۆا