ماڭعىستاۋ وبلىسىنان ەدىگە قولباسشىنىڭ مازارى تابىلدى - فوتو

استانا. قازاقپارات - ماڭعىستاۋ وبلىسىندا تاريحي مازار تابىلدى. تاريحي ەسكەرتكىش التىن وردانىڭ بەدەلدى باسشىلارىنىڭ ءبىرى ەدىگە قولباسشىعا تيەسىلى بولۋى مۇمكىن. مازاردىڭ سۋرەتتەرى جەلىدە تاراپ ۇلگەردى.

ەدىگە 20 جىل بويى التىن وردانى باسقاردى. 1399 - جىلى ليتۆانىڭ كنيازى ۆيتوۆت پەن ليتۆاعا قاشقان توقتامىستىڭ اسكەرلەرىن قۇرتىپ، 16 شايقاستان كەيىن ولاردى جەڭگەن. مەملەكەتىنىڭ گۇلدەنگەن شاعىندا ەدىگەنىڭ قول استىندا 600 مىڭ اتتى اسكەر بولعان. ول كەزىندە باتۋ حان جاۋلاعان جەرلەردى باسقارۋ الەۋەتىن التىن ورداعا قايتارعان باسشى.

ەدىگە قايتىس بولعاننان كەيىن نوعاي ورداسىن ونىڭ ۇرپاقتارى باسقاردى. كەيىن ونى قازاق حانى قاسىم ءوز مەملەكەتىنە قوسىپ العان. ەدىگە قوجا رۋىنان شىققان قوجا احمەت ياسساۋيدىڭ تىكەلەي ۇرپاعى بولىپ تابىلادى. ودان بولەك، ەدىگە تۇركى حالىقتارىنا ورتاق «قىرىمنىڭ قىرىق باتىرى» ەپوسىنىڭ قاھارمانى.

ەكسپرەسس- ك  ماڭعىستاۋ تاريحي- مادەني قورىعى باسشىسىنىڭ ورىنباسارى مارات وتەسىنوۆپەن تىلدەسكەن. ول ءوز كەزەگىندە مازاردىڭ تابىلعانىن راستادى. الايدا بۇل جەردە راسىمەن دە ەدىگە قولباسشىنىڭ جەرلەنگەنىن ءالى ساراپتاما راستاۋى ءتيىس.

«مازاردى زەرتتەۋ بارىسىندا اراب تىلىندە «ەدىگە» دەپ قاشالىپ جازىلعان تاس تابىلدى. ال مولانىڭ ءوزى ماڭعىستاۋ وبلىسىنىڭ ەسكەرتكىشتەر تىزىمىنە 2008 -جىلى ەنگەن بولاتىن. مازار وتە قاتتى زاقىمدالعان»، - دەپ اتاپ ءوتتى مارات وتەسىنوۆ.

ايتا  كەتەيىك، ەدىگە توقتامىستىڭ ۇلدارىمەن شايقاس بارىسىندا قازاقستاننىڭ باتىس ايماعىندا مەرت بولعان. بۇعان دەيىن، جۇرت قولباسشىنى قاراعاندى وبلىسىنداعى ۇلىتاۋ تاۋىنا جاقىن ماڭدا جەرلەنگەن دەپ ەسەپتەگەن ەدى.

Stan.kz