نازاربايەۆ: قوستاناي جەرى - قازاقستاننىڭ نەگىزگى استىقتى ايماعىنىڭ ءبىرى
دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى جينالعان قاۋىمدى تاۋەلسىزدىكتىڭ 25 جىلدىعىمەن قۇتتىقتاپ، رەسپۋبليكانىڭ ەلەۋلى جەتىستىكتەرىن اتاپ ءوتتى.
- ءبىزدىڭ بارلىق جەتىستىگىمىز مىقتى ىرگەتاسقا - ەل ىشىندەگى بەيبىتشىلىك پەن تۇراقتىلىققا نەگىزدەلگەن. ۇلتتىق بىرلىك پەن كەلىسىم - تاۋەلسىزدىگىمىزدىڭ باستى جەتىستىگى. ساياساتتا، ەكونوميكادا، قوعامدا، مادەنيەتتە تۇبەگەيلى وزگەرىستەر بولدى. مەملەكەتىمىزدىڭ حالىقارالىق بەدەلى ايتارلىقتاي ارتتى. اتاپ ايتقاندا، سىندارلى سىرتقى ساياساتىمىز جانە الەمدىك انتي يادرولىق قوزعالىستاعى بارشا جۇرت مويىنداعان كوشباسشىلىعىمىز قازاقستاننىڭ ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قابىلدانۋىنا سەپتىگىن تيگىزدى، - دەدى نۇرسۇلتان نازاربايەۆ.
قازاقستان پرەزيدەنتى ەلىمىز شيرەك عاسىردا الەم جۇرتشىلىعىنا تانىلىپ، الەۋمەتتىك- ەكونوميكالىق جانە مادەني الەۋەتىمىزدىڭ ارتۋىنا سەپتىگىن تيگىزگەن اۋقىمدى ناتيجەلەرگە قول جەتكىزگەنىنە توقتالدى.
- كەلەر جىلى قازاقستان «ەسكپو-2017» حالىقارالىق مامانداندىرىلعان كورمەسىن ت م د اۋماعىندا ءبىرىنشى بولىپ وتكىزگەلى وتىر. بۇل ءىس- شاراعا 100-دەن استام ەل جانە كوپتەگەن حالىقارالىق ۇيىمدار قاتىسادى. قازاقستاننىڭ ءاربىر ءوڭىرى وسى تاريحي وقيعانى تابىستى وتكىزۋگە قوماقتى ۇلەسىن قوسۋى كەرەك، - دەدى مەملەكەت باسشىسى.
اڭگىمە بارىسىندا نۇرسۇلتان نازاربايەۆ قوستاناي جەرى قازاقستاننىڭ نەگىزگى استىقتى ايماعىنىڭ ءبىرى ەكەنىن ايرىقشا اتاپ ايتتى.
- دامىعان تاۋ- كەن جانە ماشينا جاساۋ سەكتورلارى بار ءىرى اگرارلىق- ونەركاسىپ كەشەنى وسى ءوڭىر ءۇشىن عانا ەمەس، بۇكىل رەسپۋبليكا ءۇشىن دە مىقتى ەكونوميكالىق بازا بولىپ سانالادى. قوستاناي - اۋىل شارۋاشىلىعى دامىعان باستى وڭىرلەردىڭ ءبىرى، بۇل ءوڭىر ەلىمىزدىڭ ازىق- تۇلىك قاۋىپسىزدىگىنە قوماقتى ۇلەس قوسۋدا. وبلىستاعى اۋىل شارۋاشىلىعىنىڭ جالپى ءونىمى 25 جىل ىشىندە 295 ميلليارد تەڭگەگە دەيىن ءوستى، - دەدى مەملەكەت باسشىسى.
قازاقستان پرەزيدەنتى سونداي- اق ءوڭىردىڭ رەسۋرستىق الەۋەتىنە جانە دامىعان ونەركاسىبىنە نازار اۋداردى.
- مۇندا اسبەست قورىنىڭ 100 پايىزى، رەسپۋبليكاداعى اليۋمينيي شيكىزاتىنىڭ % 98- دان استامى جانە تەمىر رۋداسىنىڭ % 93- ى شوعىرلانعان. يندۋستريالاندىرۋ جىلدارىندا وبلىستا 121 ميلليارد تەڭگە ينۆەستيتسيا تارتىلعان 82 جوبا ىسكە قوسىلدى. وسىعان وراي 5 مىڭعا جۋىق جاڭا جۇمىس ورنى اشىلدى. يندۋستريالاندىرۋ اۆتوموبيل قۇرىلىسى مەن مەتاللۋرگيا سياقتى وڭدەۋ ونەركاسىبىنىڭ جاڭا سەكتورلارىن قالىپتاستىرۋعا مۇمكىندىك تۋدىردى. 2010 -جىلدان بەرى 29 مىڭعا جۋىق جەڭىل اۆتوكولىك قۇراستىرىلدى، - دەدى نۇرسۇلتان نازاربايەۆ.
بۇعان قوسا، مەملەكەت باسشىسى ءوڭىردىڭ كولىك جانە الەۋمەتتىك ينفراقۇرىلىمىن كەشەندى دامىتۋدىڭ ماڭىزدىلىعىن اتاپ ءوتتى.
- وبلىس تۇرعىندارى ءۇشىن «التىنسارين - حرومتاۋ» جانە «ارقالىق - شۇباركول» باعىتىنداعى جاڭا تەمىرجولدار قۇرىلىسى ماڭىزدى وقيعا بولدى. بۇل الەۋمەتتىك- ەكونوميكالىق دامۋعا تىڭ سەرپىن بەردى. 25 جىل ىشىندە وڭىردە 5 ميلليون شارشى مەترگە جۋىق تۇرعىن ءۇي پايدالانۋعا بەرىلدى، - دەپ اتاپ ءوتتى قازاقستان پرەزيدەنتى.
قوستانايلىقتار نۇرسۇلتان نازاربايەۆقا وڭىرگە ۇدايى كورسەتىپ وتىرعان قامقورلىعى جانە ءتيىمدى مەملەكەتتىك ساياساتى ءۇشىن العىس ءبىلدىردى.
سونداي- اق كەزدەسۋ بارىسىندا قوستاناي وبلىسىنىڭ اكىمى ا. مۇحامبەتوۆ وبلىستاعى الەۋمەتتىك- ەكونوميكالىق جاعداي جانە ونى دامىتۋ پەرسپەكتيۆالارى تۋرالى باياندادى.
سوڭىندا مەملەكەت باسشىسى جينالعان قاۋىمدى قازاقستان تاۋەلسىزدىگىنىڭ 25 جىلدىعىمەن قۇتتىقتاپ، ولارعا بەرەكە- بىرلىك پەن تابىس تىلەدى.
