كوشەنى قولمەن جۋۋ وقيعاسىنا قالا اكىمى تۇسىنىك بەردى

استانا. قازاقپارات - جۇمىسشىلار اسفالتتى قولىمەن جۋىپ جاتقان سۋرەت بۇگىن ەلىمىزدىڭ الەۋمەتتىك جەلىسىندە قىزۋ تالقىلانىپ جاتىر. سۋرەتتى جۇكتەگەن ازاماتتاردىڭ مالىمەتىنشە، بۇل - قوستاناي قالاسىندا بولعان وقيعا ەكەن.

 «قازاقپارات» ءتىلشىسى قوستاناي قالاسىنىڭ اكىمدىگىنە حابارلاسىپ، شۋ شىعارعان سۋرەتكە قاتىستى تۇسىنىكتەمە الدى.

«جۇمىسشىلار جولدى قولىمەن جۋدى» دەپ جازىلىپتى. الايدا، تۇسىندىرە كەتەتىن جايت، سۋرەتتەگى كورىنىس جولدىڭ بۇزىلعان جەرلەرىن قالپىنا كەلتىرۋ ءۇشىن قولدانىلاتىن تەحنيكالىق جۇمىس. جولدىڭ بۇزىلعان ۋچاسكەسىنە بوياۋدى دۇرىستاپ جاعىپ، شاڭ كىرگىزبەي، بوياۋدى تازا جەرگە جاعۋ ءۇشىن وسىنداي ءادىس كەرەك. ونىڭ ۇستىنە، ءقازىر كۇز مەزگىلى، اينالا تولعان شاڭ»، - دەيدى قوستاناي اكىمىنىڭ باسپا ءسوز حاتشىسى سامات جاندىلدين.

ونىڭ ايتۋىنشا، جولدىڭ بۇزىلعان جەرىنە جاعىلاتىن بوياۋ ۇزاق ۋاقىتقا شىداۋ ءۇشىن جۇمىسشىلار ارنايى ەرىتىندىمەن جولدىڭ سول جەرىن تازالاپ جاتقان ەكەن.

 «ياعني، جولدى قالاي بولسا، سولاي جوندەي سالماۋ ءۇشىن، ارنايى ەرىتىندىمەن تازالاعان. وسى ءساتتى سۋرەتكە ءتۇسىرىپ العان شىعار... ءبىزدىڭ ايتارىمىز وسى. قوستاناي قالاسىنىڭ كوشەلەرىن قولمەن ەمەس، ارنايى كولىكتىڭ كومەگىمەن جۋامىز»، - دەدى باسپا ءسوز حاتشى.

اۆتور: كەنجەكەي توقتامۇرات قىزى