ۇزىناعاش بازارىندا مال ساتقان ءۇش جىگىت ءىز- ءتۇزسىز جوعالىپ كەتتى
مال ساۋداسىن كاسىبىنە اينالدىرعان 1979 -جىلعى دولدان ۇلى جارقىنبەك، 1973 -جىلعى زارلىحان ۇلى مۇقيات پەن ءالىمحان قادىلبەك ەسىمدى جىگىتتەر شىعىس قازاقستان وبلىسىنىڭ تارباعاتاي اۋدانىنان 40 باس مال ساتىپ الىپ، ونى ەكى جۇك كولىگىمەن 17- قىركۇيەك، سەنبى كۇنى، الماتى ماڭىنداعى ۇزىناعاش بازارىنا شىعارعان.
كوكسۋ اۋدانى قازاقستان اۋىلىنىڭ تۇرعىنى تۇرسىن ءامىربايدىڭ ايتۋىنشا، جوعالعان ءۇش جىگىت سول كۇنى بازارعا شىعارعان مالدارى وتپەي، كەلەسى كۇنى، ياعني جەكسەنبىدە، قايتا بازارعا بارادى. سول كەزدە ولارعا ءبىر ازامات كەلىپ، «مالدارىڭدى تۇگەلدەي مەن ساتىپ الامىن» دەپ، ءار باس مالعا 143 مىڭ تەڭگەدەن باعا قويادى ءارى ۇزىناعاشتان 40 كيلومەتر مولشەرىندە شالعاي ورنالاسقان اۋىلىنا جەتكىزىپ بەرۋىن وتىنەدى.
كەلىسىم بويىنشا اتالعان ءۇش جىگىت 40 باس مال تيەلگەن ەكى جۇك كولىگىمەن بازاردان شىعادى. ونى كورگەن ءبىر كۋاگەر مالداردى ساتىپ الامىن دەپ كەلىسكەن ادامنىڭ دا ءتۇرىن جاتتاپ العان.
«سول كۇنى تۇستەن باستاپ ءۇش جىگىتتىڭ قالتا تەلەفوندارى وشكەن. سودان بەرى ەشقانداي حابار دا، دەرەك تە جوق. ەگەر مالدارى شىنىمەن ساتىلعان بولسا قالتالارىندا 5 ميلليون 720 مىڭ تەڭگە كولەمىندە اقشا بولدى دەگەن ءسوز. نە ءولى، نە ءتىرى ەكەنىنەن بەيحابارمىز. باۋىرلارىمدى ىزدەپ تابۋعا كومەكتەسىڭىزدەرشى» ، - دەيدى دەرەكسىز كەتكەن جىگىتتەردىڭ اعايىنى ادال زارلىحان ەسىمدى ازامات.
ونىڭ ايتۋىنشا، دۇيسەنبى كۇنى تۇستەن كەيىن الماتى- استانا تاسجولى بويىنداعى قانشەڭگەل اۋىلى ماڭىندا ءۇش جىگىتكە تيەسىلى جۇك كولىكتەرىنىڭ ءبىرى ورتەنگەن كۇيدە تابىلعان. سول كۇنى كەشكە قاراي ورتەنگەن كولىكتىڭ جانىنان جەڭىل كولىككە مىنگەن ەكى جىگىتتىڭ كەتىپ بارا جاتقانىن، ازدان سوڭ ورتەنگەن ماشينانى وزگە بىرەۋلەردىڭ بارىپ وشىرگەنىن كورگەن كۋاگەرلەر دە تابىلدى.
قازىر بۇل ىسپەن الماتى وبلىسى جامبىل اۋداندىق پوليتسەيلەرى اينالىسىپ جاتقان كورىنەدى.
ۇلاربەك دالەي ۇلى
