مومىش ۇلىنىڭ كەلىنى: قازاقتىڭ قىزدارى كۇيەۋگە تيگەنگە دەيىن ەشقاشان باسىنا ورامال سالماعان
مۇنى قوعام قايراتكەرى، باۋىرجان مومىش ۇلىنىڭ كەلىنى زەينەپ احمەتوۆا «ايەلدەر ۇيىمدارىنىڭ جاستار اراسىندا ءدىني ەكسترەميزمنىڭ الدىن الۋداعى ءرولى» تاقىرىبىنداعى رەسپۋبليكالىق عىلىمي-تاجىريبەلىك كونفەرەتسياسى بارىسىندا ايتتى دەپ حابارلايدى BNews.kz.
«مۇسىلمان بولۋ ءۇشىن اراب بولۋدىڭ قاجەتى جوق. ارابتان ۇيرەنەتىن ەشتەڭەمىز دە جوق. ءوزىمىزدىڭ سالتىمىز بار، ءوزىمىزدىڭ ءداستۇرىمىز بار. قازاقتىڭ قىزدارى كۇيەۋگە تيگەنگە دەيىن ەشقاشان باسىنا ورامال سالماعان. مەنىڭشە، ادامداردىڭ كوبى قوعامدا وزدەرىنىڭ ەرەكشەلىگىن كورسەتۋ ءۇشىن وسىلاي ىستەپ ءجۇر. مەن ءوز باسىم، كىشكەنتاي قىز بالانىڭ باسىن تۇمشالاپ، ورامال نەمەسە حيدجاب سالىپ قويعان دۇرىس ەمەس دەپ ەسەپتەيمىن. ويتكەنى، ول ەرتەڭگى كۇنى ءوزى تاڭداۋى كەرەك. بالانىڭ ىشكى جان دۇنيەسى، قۇدايدى ىزدەۋى، اللانى ءتۇسىنۋى، سونىڭ بارلىعى كەلگەن كەزدە ول ءوزى تاڭداۋ جاسايدى. بىزدىڭ قوعامدا ەكى كوزبەن كورىنەتىنگە سەنەمىز، ال تىلسىمعا سەنە بەرمەيمىز. سىرتقى كورىنىس، سىرتقى ەلىكتەۋ. دىندى ۇزىن، قىسقا كويلەك كيگەن سەكىلدى «موداعا» اينىلدىرىپ العان»، - دەيدى احمەتوۆا.
قوعام قايراتكەرىنىڭ ايتۋىنشا، بۇنىڭ بارلىعى قازاقتىڭ تۇتاستىعىن، قازاقتىڭ ىنتىماعىن بۇزۋ ءۇشىن ىستەلىپ جاتقان دۇنيە.
«ايتپەسە، اتام زاماننان كەلە جاتقان سالت 25 جىلدىڭ ىشىندە دۇرىس بولماي قالدى، ونىڭ بارلىعى دىنگە قارسى بولىپ قالدى دەگەنگە قارسىمىن. قازاق سالتىنىڭ دىنگە قارسى ەشتەڭەسى جوق. اتا داستۇرىمىزدەن الىستاساق، قۇردىمعا كەتەتىن جەرىمىز سول بولادى»، - دەيدى احمەتوۆا.
