جانىبەك ءالىمحان ۇلى: وليمپياداعا وزبەك بوكسشىسىن نوكاۋتقا تۇسىرسەم دەپ بارعانمىن
جانىبەك ۇلتتىق قۇرامادان كەتىپ، ءوز باعىن كاسىبي رينگتەن ىزدەمەكشى.
بۇل تۋرالى ول NUR. KZ پورتالىنا بەرگەن سۇحباتىندا ايتتى.
الماتىداعى بوكس كەشىندە جانىبەك ءالىمحان ۇلى كەزىندە گولوۆكيننەن ۇتىلعان ميلتون نۋنەسپەن قولعاپ تۇيىستىرەدى. بىردەن قارىمدى بوكسشىعا تاپ بولعان جانىبەك ءبىزدىڭ بىرنەشە سۇراعىمىزعا جاۋاپ بەرگەن ەدى.
- جانىبەك، الماتىدا وتەتىن قانات يسلامنىڭ كاسىبي بوكس كەشىندە ءسىز دە ونەر كورسەتەسىز. وليمپيادادان كەيىن كوپ ۋاقىت وتە قويعان جوق، جەكپە-جەككە دايىنسىز با؟
- دايىنمىن. وليمپيادانىڭ اياقتالعانىنا كوپ ۋاقىت وتپەسە دە، ءوز-وزىمە كەلىپ، ۇلكەن شەشىم قابىلدادىم. ياعني، ەندى مەن تەك قانا كاسىبي بوكستا ونەر كورسەتەمىن.
- دەمەك، ۇلتتىق قۇرامادان كەتتىڭىز عوي؟ ەندى ءسىزدى وليمپيادادان كورمەيمىز بە؟
- ءيا، وليمپيادا شىڭى ماعان باعىنعان جوق. ۇلتتىق قۇرامادا ۇلكەن وزگەرىستەر بولىپ جاتىر. مەن عانا ەمەس، بىرنەشە تانىمال بوكسشىلارىمىز اۋەسقوي بوكستان كەتپەكشى. ولاردىڭ ءبىرى كاسىبي بوكسقا بەت بۇرسا، ەندى ءبىرى جاسىنىڭ كەلۋىنە بايلانىستى بوكسپەن قوش ايتىسۋدا. بۇدان بىلاي مەنى تەك كاسىبي بوكستان كورەسىزدەر.
- ءسىز وليمپياداعا قاتىسقاندا بىردەن موينىڭىزعا التىن مەدال ءىلىپ قويعاندار كوپ بولدى. تەحنيكاڭىزعا شەتەلدىكتەر دە تاڭ قالىپ، بولاشاق وليمپيادا چەمپيونى دەپ قاراستىردى. الايدا، ءسىز قولا جۇلدەگە دە ىلىككەن جوقسىز...
- مەنىڭ وليمپياداداعى جەڭىلىسىم جانكۇيەرگە اۋىر تيگەنىن بىلەمىن. مەنىڭ وزىمە دە وڭاي سوقپادى. سولاي بولۋى كەرەك شىعار... ءبىر نارسەنى ايتقىم كەلەدى. مەن وليمپيادانىڭ فينالىندا وزبەك بوكسشىسى باقتيار مەليكۋزيەۆتى جەڭەمىن دەپ بارعانمىن. ويتكەنى، جاراقات الىپ، دايىندىعىم دۇرىس بولماي جۇرگەندە باقتيار مەنى ۇتىپ كەتتى. ياعني، مەنىڭ ءالسىز كەزىمدى پايدالاندى. وسىدان سوڭ قالايدا ەسە قايتارامىن دەپ ءجۇردىم. ەگەر وليمپيادادا جولىقسام، وزبەك بوكسشىسىن ءبىرىنشى راۋندتا-اق قۇلاتامىن دەپ وزىمە ۋادە بەرگەم. ويتكەنى، وزگەلەردەن گورى، الەمدىك سىندا وزبەكستان بوكسشىسىنان جەڭىلگەنىم جانىما قاتتى باتقان. الايدا، ءبىز ويلاعان نارسەلەر بولا بەرمەيدى...
- ريونى وتە ءساتتى باستاعان جانىبەككە مەدال الۋ ءۇشىن نە جەتپەي قالدى؟
- ءبىرىنشى كەزدەسۋدە شىنتاعىمدى جاراقاتتادىم. سودان سوڭ، باپكەرلەر ماعان اسا ساق بولۋدى، قارسىلاستا نوكاۋتقا جىبەرمەي، مەيىلىنشە، ۇپاي سانىمەن ۇتۋدى ەسكەرتتى. ەكىنشى جەكپە-جەگىم تۋرا وسىلاي ءوتتى. ءۇشىنشى كەزدەسۋدە ءازىربايجاندىق بوكسشىعا دا وسىنداي تاكتيكا ۇستاندىق. ويتكەنى، جوسپار بويىنشا، جارتىلاي فينالدا كۋبا، فينالدا وزبەكستان بوكسشىسىمەن كەزدەسۋدى جوسپارلاعان ەدىك. الايدا، ءازىربايجاندىق بوكسشىدان العاشقى 2 راۋندتا ۇتىلىپ جاتقانىمدى بىلمەدىم. ويتكەنى، ءوزىم باسىمدىق تانىتقانىما سەنىمدى بولدىم. سودان ءۇشىنشى راۋندتا قولدىڭ جاراقاتىنا قاراماستان، اشىق ايقاسقا كوشتىم. ءبىراق، ءبارى كەش ەدى...
- كاسىبي بوكستا باسقا ەمەس، گەننادي گولوۆكينگە توتەپ بەرگەن ميلتون نۋنەسمەن جۇدىرىقتاساسىز...
- ءيا، بىردەن مىقتى قارسىلاستى تاڭداپ الۋىمىزدىڭ دا سەبەبى جوق ەمەس. مەيىلىنشە، جاقسى ۇپاي، جاقسى رەيتينگ جيناپ الۋ ءۇشىن قارىمدى بوكسشىنى تاڭداعانى دۇرىس بولدى. مەن ازىرگە 6 راۋند جۇدىرىقتاسامىن. بولاشاقتا گولوۆكيننىڭ دەڭگەيىنە جەتەرمىن، جەتپەسپىن... باستىسى، قازاق جۇدىرىعىنىڭ مىقتىلىعىن دالەلدەگىم كەلەدى.
