داريعا نازاربايەۆا: كوپ جىلعى تۇراقتىلىق قازاقستاندىقتاردى بوساڭسىتىپ جىبەردى
ول بۇگىندە تەرروريزمدى الدىن الۋدىڭ ورنىنا ونىڭ تەك سالدارىمەن كۇرەس ءجۇرىپ جاتقانىن العا تارتتى دەپ جازادى «ازاتتىق راديوسى».
«ءدىن جانە ازاماتتىق قوعامدى دامىتۋ ىستەرى بويىنشا مينيسترلىك قۇرىلدى. مەن بۇل جايت مەملەكەتتىڭ بۇگىندە تەرروريزم جانە ءدىني ەكسترەميزممەن كۇرەسكە بارىنشا كوڭىل بولگەندىگىن اڭداتادى دەپ ويلايمىن»، - دەيدى داريعا نازاربايەۆا.
«ماسەلە ءبىزدىڭ قانداي مەملەكەت قۇرعىمىز كەلىپ وتىرعانىندا: زايىرلى ما، الدە ءدىني مە؟ ولاردىڭ ارا-قاتىناسىنداعى تەپە-تەڭدىك قايدا؟ كەلەسى ماسەلە: جات جەردەن كەلگەن ءدىني كانوندار ءبىزدىڭ زايىرلى زاڭنامامىزعا قانشالىقتى سايكەس كەلەدى؟»، - دەپ ساۋالدار تاستادى ول استاناداعى دوڭگەلەك ۇستەلدە.
نازاربايەۆا بۇل سۇراقتارعا جاۋاپ تابۋدىڭ ماڭىزدىلىعىن ايتىپ ءوتتى.
«ەگەر ءبىز بۇل سۇراقتارعا جاۋاپ تابا الساق، ودان ءارى تۇشىمدى شەشىمدەر قابىلداۋ جەڭىلىرەك بولادى. بۇگىندە ۇسىنىلىپ وتىرعانداردى، ارينە ىستەۋ قاجەت. دەگەنمەن بۇل باستى سەبەپتى تۇپتامىرىمەن جويا المايدى. سەبەبى، بۇگىنگى تاڭدا ءبىز تەك سالدارىمەن عانا كۇرەسىپ كەلەمىز»، - دەيدى نازاربايەۆا.
داريعا قازاقستان تاۋەلسىزدىك العالى بەرى تەرروريزم قاۋپىن بىلمەي كەلگەندىگىنە باسا نازار اۋداردى. ونىڭ ويىنشا، قازاقستاننىڭ قارۋلى كۇشتەرى ءوز مىندەتىن جاقسى اتقارىپ كەلەدى. الايدا «نۇرسۇلتان نازاربايەۆتىڭ ارقاسىندا مۇمكىن بولعان» تۇراقتىلىق پەن تىنىشتىققا تولى جىلدار قازاقستاندىق قوعام مەن قارۋلى قۇرىلىمداردى بوساڭسىتىپ جىبەردى دەيدى ول.
«ءبىز وسى جىلدارعا دەيىن بەيبىت وڭىردە تۇرىپ كەلدىك، الەم بويىنشا ءجۇرىپ جاتقان تەررورلىق اكتىلەر مەن ادام ولىمدەرى بىزدەن الىس، بىزگە جەتپەيدى دەپ ويلاپ كەلدىك. بۇل ۇلكەن قاتەلىك بولدى. ال بۇگىندە بۇل ىندەت بىزگە دە كەلىپ جەتكەنىن، ءبىزدىڭ بالالارىمىزعا، بەيبىت حالىققا قاۋىپ ءتوندىرىپ تۇرعانىن ۇعىنا باستادىق. بۇگىنگى تاڭدا بالالار باقشاسى، مەكتەپتەر، مادەنيەت، سپورت نىساندارى، تەمىر جول ستانتسيالارى، اۋەجاي مەن اۆتوۆوكزالدارداعى قاۋىپسىزدىكتى قامتاماسىز ەتۋگە وزگەشە كوزقاراسپەن ءمان بەرۋىمىز كەرەك»، - دەيدى داريعا نازاربايەۆا.
سەنات دەپۋتاتى قارۋلى كۇشتەرگە وقىس جاعدايلاردا بەلسەندى ارەكەت ەتە الاتىنداي ۇلكەن وكىلەتتىك بەرىلۋى ءتيىس دەگەن پىكىردە.
