زاعيپ بالالاردان قۇرالعان «ءسات» توبى كونسەرتتەرىنە شاقىرادى
كەش قوناقتارى اسحات تارعىن، مارجان اراپبايەۆا جانە تاعى دا باسقا ەل جۇلدىزدارى.
«ءسات» توبىن بىلمەيتىن جان كەمدە-كەم شىعار. شىمكەنتتىك «ءسات» توبى بۇرىن ازات، تۇرار، ساپارباي ەسىمدى كوز جانارلارىنان ايىرىلعان جىگىتتەردەن قۇرالعان تريو ەدى. ءۇش بالا دا «ءۇمىت» مەكتەپ-ينتەرناتىندا كىشكەنتايىنان بىرگە وسكەن. ولاردىڭ العاش ۇلكەن ساحنادا ايتقان، كەيىن كليپ بولىپ تۇسىرىلگەن مۇقاعالي ماقاتايەۆتىڭ «كونەمىز عوي» ولەڭىنە جازىلعان اندەرى بارشا قازاق جۇرتىنىڭ جۇرەگىن ەلجىرەتىپ، كوزدەرىنە جاس تولتىراتىن. بۇگىندە ولار ءوز الدارىنا وتاۋ قۇراتىن جاستا. تريوداعى تۇرار ونەردەگى جولىن ۋاقىتشا توقتاتۋعا شەشىم قابىلداعاندىقتان «ءسات» ەندىگىدە دۋەت بولدى.
ايتا كەتەيىك، «ءسات» توبى قۇرىلعالى بەرى تالاي جۇلدەنى ەنشىلەدى، تالاي ەلدى تاڭداي قاقتىرىپ ۇلگەردى. جۇلدەلەر تىزبەگى 2008-جىلى استانادا وتكەن رەسپۋبليكالىق بايقاۋدان باستالعان. كەيىن سانكت-پەتەربور قالاسىندا 11 مەملەكەتتىڭ ءانشىسى سايىسقان بايقاۋدا ۇزدىك اتاندى. 2009، 2011-جىلدارى «سامعاۋ» ۇلتتىق سىيلىعىنىڭ يەسى، 2011-جىلى «ەڭ ۇزدىك ورىنداۋشى» اتاعىنا لايىق دەپ تانىلعان.
سونداي-اق ر ف ەڭبەك سىڭىرگەن ءارتىسى ديانا گۋرتسكايانىڭ ۇيىمداستىرۋىمەن وتكەن «بەلايا تروست. بەز گرانيتس» اتتى زاعيپ بالالاردىڭ حالىقارالىق قايىرىمدىلىق فەستيۆالىندە «ءساتتىڭ» جىگىتتەرى تاماشا ونەر كورسەتىپ، ماسكەۋ ساحناسىندا لاريسا دولينا، يگور نيكولايەۆ، دميتري ماليكوۆتارمەن بىرگە ءان شىرقادى.
