قازاقستان مەن قىتاي سوت تورەلىگىن جۇزەگە اسىرۋداعى ىنتىماقتاستىقتى كەڭەيتۋگە نيەتتى

استانا. قازاقپارات - الماتى قالاسىندا جوعارعى سوتتىڭ مامانداندىرىلعان سوت القاسىنىڭ ءتوراعاسى ا. قىدىربايەۆا پارتكوم ءتوراعاسىنىڭ ورىنباسارى، ق ح ر جوعارعى حالىق سوتى ءتوراعاسىنىڭ ءبىرىنشى ورىنباسارى شەن دەيۋنمەن كەزدەستى.

ا. قىدىربايەۆا مەيماندى قارسى الا وتىرىپ، قازاقستان مەن قىتاي اراسىنداعى قارىم-قاتىناستاردىڭ ءوزارا تۇسىنىستىك پەن سەنىمدىلىكتىڭ ءداستۇرلى اياسىندا داميتىنىن اتاپ ءوتتى. ەكى ەلدىڭ سوت ورگاندارىنىڭ اراسىنداعى بەلگىلەنگەن تۇسىنىستىك پەن تۇراقتى قارىم-قاتىناس قازاقستان-قىتاي ىنتىماقتاستىعىنىڭ ماڭىزدى اسپەكتىسى بولىپ تابىلاتىنى ەسكەرىلدى.

كەزدەسۋ شەڭبەرىندە تاراپتار ەكى ەلدىڭ سوت جۇيەسىنىڭ دامۋى تۋرالى وزەكتى اقپاراتتارمەن الماستى. ا. قىدىربايەۆا مەيماندى قازاقستان سۋديالارىنىڭ VII سەزى وتەتىنى تۋرالى، ونىڭ بارىسىندا جاڭا ادەپ كودەكسى قابىلداناتىنى تۋرالى حاباردار ەتتى. سونداي-اق، شەتەلدىك مەيمان ەلباسى باستاماشىلىق ەتكەن «100 ناقتى قادام» ۇلت جوسپارىنىڭ شەڭبەرىندە جۇرگىزىلگەن سوت جۇيەسىنىڭ رەفورماسى تۋرالى ناقتى حاباردار بولدى.

سۇحبات بارىسىندا ا. قىدىربايەۆا سۋديالاردى دايىنداۋ جۇيەسىنە ەرەكشە كوڭىل ءبولىپ، «قازاقستاندا سۋديالاردىڭ بىلىكتىلىگىن نىعايتۋعا جانە جوعارىلاتۋعا ەرەكشە كوڭىل بولىنەدى. اعىمداعى جىلدان باستاپ سوت تورەلىگى اكادەمياسى جوعارعى سوتقا بەرىلدى. قىتايدىڭ سۋديالار كورپۋسىنىڭ ءبىلىمى، وقۋ پروتسەسىن ۇيىمداستىرۋدى زەرتتەۋ، وقىتۋ ءادىسى مەن عىلىمي زەرتتەۋلەردى جۇرگىزۋ سالالارىنداعى تاجىريبەسى بىزگە وتە قىزىقتى»، - دەپ ايرىقشا اتاپ ءوتتى.

كەزدەسۋ سوڭىندا تاراپتار سوت تورەلىگىن جۇزەگە اسىرۋ سالاسىنداعى ىنتىماقتاستىقتى كەڭەيتۋگە نيەتتەرىن ءبىلدىردى.