08:51, 23 - قىركۇيەك 2016 | GMT +5
قازاقستاندىقتار الماتىداعى بوكس كەشىن تىكەلەي ەفيردەن كورە الادى
استانا. قازاقپارات - قازاقستاندىق سپورت سۇيەر قاۋىم 24- قىركۇيەك كۇنى الماتىدا وتەتىن كاسىپقوي بوكس كەشىن «حابار» ارناسىنان تىكەلەي ەفيردە تاماشالاي الادى.
بۇل تۋرالى دودانى ۇيىمداستىرۋشى رۋسلان ابدۋسالاموۆ باسپا ءسوز ءماسليحاتىندا حابارلادى، دەپ جازادى massaget.kz.
- بالۋان شولاق اتىنداعى مادەنيەت جانە سپورت سارايىندا وتەتىن بوكس كەشى استانا ۋاقىتىمەن ساعات 17:00 دە باستالادى. جەكپە-جەكتەردىڭ قىزىعىنان كەش قالماۋ ءۇشىن ەرتەرەك كەلگەندەرىڭىز ابزال. بارلىق كەزدەسۋلەردى «حابار» ارناسى تىكەلەي ەفيردە كورسەتەتىن بولادى، - دەدى رۋسلان ابدۋسالاموۆ.
ايتا كەتەيىك، بۇل شارا قازاقستان رەسپۋبليكاسىنىڭ 25 جىلدىعى مەن الماتى قالاسىنىڭ 1000 جىلدىق مەرەكەسىنە ارنالىپ وتكىزىلەدى. بوكس كەشىنىڭ باستى جەكپە-جەگى ءبىرىنشى اۋىر سالماقتاعى قازاقستاندىق بوكسشى يسا اقبەربايەۆ پەن نەمىس مايك كۋرتسۆەيل اراسىندا وتەدى. ولار ءبىرىنشى اۋىر سالماقتا «GBC» ۇيىمى دايىنداعان ارنايى چەمپيوندىق بەلبەۋگە تالاساتىن بولادى.
