ەلباسى جاڭا «استانا-پەتروپاۆل» تاس جولىنىڭ ساپاسىمەن تانىستى

پەتروپاۆل. قازاقپارات - مەملەكەت باسشىسى نۇرسۇلتان نازاربايەۆ سولتۇستىك قازاقستان وبلىسىنا جۇمىس ساپارى بارىسىندا «استانا-پەتروپاۆل» تاس جولىنىڭ ساپاسىنا باعا بەردى.

«ادەمى جول سالىنعان. پەتروپاۆلدىقتار مۇنداي جولمەن بۇعان دەيىن ءجۇرىپ كورگەن جوق. 700 كيلومەتر اۋدانارالىق جولداردى جاساۋ كەرەك. جولسىز ءىس بىتپەيدى. مەن بۇكىل قازاقستاندا جوعارى ساپالى جول سالدىرعىم كەلەدى. ەگەر ءبىز 25 جىلدا باسقالار ءجۇز جىلدا جاسايتىن ءىستى جاسادىق دەپ ايتاتىن بولساق، وندا تاۋەلسىزدىكتىڭ وسى مەرەكەسى ءار اۋىلدا سەزىلۋى ءتيىس. جول سالىنىپ، اۋىز سۋ، مەكتەپتەر، جاقسى دارىگەرلەر بولۋى كەرەك. ادامدار ءومىرى وزگەردى دەپ ايتىپ جۇرۋلەرى ءتيىس»، - دەدى مەملەكەت باسشىسى.

ق ر پرەزيدەنتى تاۋەلسىزدىك العان جىلدارى %40 پايىز قازاقستاندىق كەدەيشىلىكتە كۇن كەشكەنىن، قازىر بۇل كورسەتكىش 2 پايىزعا دەيىن تومەندەگەنىن اتاپ ءوتتى.

بۇدان بولەك، س ق و جۇرتشىلىعىمەن كەزدەسۋ بارىسىندا ەلباسى ەلدى كوگالداندىرۋ جوسپارلارىمەن دە ءبولىستى.

«سولتۇستىك قازاقستان وبلىسى ورماندى، جاسىل جەلەكتى، ەلىمىزدىڭ كورىكتى وڭىرلەرىنىڭ ءبىرى. وسى بايلىقتى ساقتاي ءبىلۋ كەرەك. ءبىزدىڭ كەڭ بايتاق جەرىمىزدە ورمان از. سوندىقتان «جاسىل ەل» باستاماسىنا قولداۋ بىلدىرەمىن. ءاربىر جاس ادام اعاش وتىرعىزۋى كەرەك. بارلىعىڭىزدى وسى ىسكە شاقىرامىن»، - دەدى ق ر پرەزيدەنتى.