استانانىڭ جاستار تەاترى جاڭا ماۋسىمدى «شىڭعىسحانمەن» اشادى

استانا. قازاقپارات - ەلورداداعى «جاستار» تەاترى جاڭا مەرەيتويلىق ماۋسىمىن اشادى، دەپ حابارلايدى قالا اكىمدىگىنىڭ سايتى.

2- قازاندا «جاستار» تەاترى ش. ايتماتوۆ پەن ءا. كەكىلبايەۆتىڭ «شىڭعىسحان» افساناسىمەن ءوزىنىڭ مەرەيتويلىق 10- ماۋسىمىنىڭ شىمىلدىعىن تۇرەدى. قويىلىم ساعات 19:00 باستالادى. 2007-جىلى «جاستار» تەاترىنىڭ العاشقى ماۋسىمى دا ءدال وسى قويىلىممەن اشىلعان بولاتىن.

ەسكە سالا كەتەيىك، 2010-جىلى اتالمىش قويىلىم 3-حالىقارالىق ورتالىق ازيا ەلدەرىنىڭ تەاتر فەستيۆالىنە قاتىسىپ، «ۇزدىك رەجيسسەر»، «ۇزدىك شىڭعىسحان ءرولى» اتالىمىنداعى جۇلدەگە لايىق دەپ تانىلعان.

قويىلىمنىڭ رەجيسسەرى - قازاقستاننىڭ ەڭبەك سىڭىرگەن قايراتكەرى، تەاتردىڭ كوركەمدىك جەتەكشىسى ءارى باس رەجيسسەرى نۇرقانات جاقىپباي. سپەكتاكل قازاق تىلىندە قويىلعان.

جاقىندا «جاستار» تەاترىنىڭ ارتىستەرى ХХІV رەسپۋبليكالىق دراما تەاترلارى فەستيۆالىندە ونەر كورسەتتى. تەاتر ج. پ. پيلو مەن و. شۋلتەزدىڭ «موتسارت» قويىلىمىمەن (ميۋزيكلى) گران-پري الدى. سونىمەن قاتار، برەست قالاسىندا «بەلايا ۆەجا» ХХІ حالىقارالىق تەاترلار فەستيۆالى اياقتالدى. ش. ايتماتوۆ پەن ءا. كەكىلبايەۆتىڭ «شىڭعىسحان» سپەكتاكلى ءۇشىن تەاتر ارتىستەرى «ەڭ اسەرلى قويىلىم» سىيلىعىن يەلەندى.