ق ر پرەزيدەنتى پەتروپاۆلداعى سپورت سارايىنا باردى

پەتروپاۆل. قازاقپارات - ق ر پرەزيدەنتى نۇرسۇلتان نازاربايەۆ سولتۇستىك قازاقستان وبلىسىنا جۇمىس ساپارى بارىسىندا پەتروپاۆلداعى سپورت سارايىنا باردى.

مەملەكەت باسشىسى سولتۇستىكقازاقستاندىق سپورتشىلارمەن كەزدەستى. مۇز ارەناسىندا «قۇلاگەر» حوككەي كلۋبىنىڭ پرەزيدەنتى بولات كارابالين مەملەكەت باسشىسىنا «قۇلاگەر» كومانداسىنىڭ جەيدەسىن تارتۋ ەتتى.

سپورت سارايىندا مەملەكەت باسشىسى مەن وبلىس جۇرتشىلىعى وكىلدەرىنىڭ كەزدەسۋى ءوتتى. وبلىستىڭ حال- احۋالىن ايتا كەلە، س ق و اكىمى ەرىك سۇلتانوۆ ءوڭىر حالقىنىڭ ۇشتەن ءبىر بولىگىنىڭ سپورتپەن بەلسەندى اينالىساتىنىن اتاپ ءوتتى. «سپورتتىق عيماراتتار سانى ەسەلەپ كوبەيۋدە. وتكەن جىلى مۇز ارەناسى بار سپورت سارايى سالىندى. ءبىز سولتۇستىك قازاقستان وبلىسىنىڭ حوككەي ءداستۇرىن جاڭعىرتتىق. وتكەن جىلى قۇرىلعان «قۇلاگەر» كلۋبى بيىل قولا جۇلدەگە يە بولدى. ءبىز سولتۇستىك قازاقستاندىق ۆەلومەكتەپ تۇلەكتەرى نەگىزىن قۇراعان (ۆينو فوريەۆەر) كاسىبي ۆەلوسيپەد كلۋبىنىڭ جەتىستىكتەرىن ماقتان تۇتامىز»، - دەدى ءوڭىر اكىمى ەرىك سۇلتانوۆ.

مۇز ارەناسى جانە جەڭىلاتلەتيكالىق مانەجى بار سپورت سارايى وتكەن جىلى تامىز ايىندا اشىلدى. عيمارات اۋماعى 15 مىڭ شارشى مەتردى قۇرايدى. مۇز ارەناسى مەن مانەجدەن بولەك مۇندا تىكە جۇگىرۋ جولى، ۆەلوسيپەدشىلەر ورىنى، ترەناجەرلىك جانە فيتنەس زالدار بار. مۇز ارەناسىنىڭ تريبۋناسىنا مىڭ ادام سىيادى.

سارايدا سپورتتىڭ 12 تۇرىمەن اينالىسۋعا بولادى: حوككەي، جەڭىل اتلەتيكا، ۆەلوسپورت، بوكس، ەركىن جانە گرەك-ريم كۇرەسى، مانەرلەپ سىرعاناۋ، كونكيمەن جۇگىرۋ سپورتى، شورت-ترەك، دزيۋدو، كوركەم گيمناستيكا جانە گىر سپورتى.